raqs-e-sukut

har taraf ek pur-asrār sī tārīkī hai

koī aahaT nahīñ āvāz nahīñ shor nahīñ

vo ḳhamoshī hai ki tāroñ kā bhī dam ghuTtā hai

chāñd hairāñ hai ki ruk jaa.e na shab kī dhaḌkan

raat rotī hai ki tham jaa.e na ḳhud chāñd kī saañs

vahshat-e-fikr se kaliyoñ kī nigāheñ ḳhāmosh

shiddat-e-ġham se havāoñ kī haiñ sāñseñ larzāñ

gardish-e-vaqt ne lī hai vo bhayānak karvaT

saaz ke badle ab hāthoñ meñ hai sang-e-ātish

jin laboñ par the tarannum ke sitāre raqsāñ

jin nigāhoñ meñ tabassum kī thī ḳhvābīda bahār

miT ga.e ek hī jhoñke se vo raḳhshanda nuqūsh

gir paḌā ek hī āñdhī meñ vo aivān-e-nigār

ab musallat hai lab-e-nai pe sharāroñ kā hujūm

chang-e-ehsās hai gum apne hī sannāToñ meñ

ajnabiyyat kā vo māhaul hai taarī har-sū

chashm-e-iḳhlās ġhazal-ḳhvāñ hai bayābānoñ meñ

ab bhī hai vaqt sañbhal jaao lapakte saayo

ab bhī chehre se haTā lo ye dahaktī sī naqāb

varna barsāte rahe tum jo ye sho.aloñ kī phuvār

ḳhud taras jāoge phūloñ kī hañsī ko ik roz

har taraf ek pur-asrar si tariki hai

koi aahaT nahin aawaz nahin shor nahin

wo KHamoshi hai ki taron ka bhi dam ghuTta hai

chand hairan hai ki ruk jae na shab ki dhaDkan

raat roti hai ki tham jae na KHud chand ki sans

wahshat-e-fikr se kaliyon ki nigahen KHamosh

shiddat-e-gham se hawaon ki hain sansen larzan

gardish-e-waqt ne li hai wo bhayanak karwaT

saz ke badle ab hathon mein hai sang-e-atish

jin labon par the tarannum ke sitare raqsan

jin nigahon mein tabassum ki thi KHwabida bahaar

miT gae ek hi jhonke se wo raKHshanda nuqush

gir paDa ek hi aandhi mein wo aiwan-e-nigar

ab musallat hai lab-e-nai pe shararon ka hujum

chang-e-ehsas hai gum apne hi sannaTon mein

ajnabiyyat ka wo mahaul hai tari har-su

chashm-e-iKHlas ghazal-KHwan hai bayabanon mein

ab bhi hai waqt sanbhal jao lapakte sayo

ab bhi chehre se haTa lo ye dahakti si naqab

warna barsate rahe tum jo ye shoalon ki phuwar

KHud taras jaoge phulon ki hansi ko ek roz