raste ruTh jate hain

agar pāmāl rāhoñ par qadam rakhne kī aadat ḳhatm ho jaa.e

mashām-e-jāñ meñ ḳhushbū kī bajā.e dard dar aa.e

visāl āmāda shah-rāhoñ pe furqat kā baserā ho

ik aisā vaqt aa jaa.e

jo terā ho na merā ho

mohabbat kī sunahrī jhiil par ġham kī ghanerī raat chhā.ī ho

kināroñ par faqat nam-dīda tanhā.ī kī kaa.ī ho

chamakte pāniyoñ par thartharāte aks kho jaa.eñ

rū-pahlī dhuup meñ sarsabz pagDanDī achānak zard paḌ jaa.e

samundar kī namīda ret par naqsh-e-qadam lahreñ nigal jaa.eñ

vo āñkheñ jin meñ sat-range sajīle ḳhvāb rahte haiñ

vahāñ aaseb bas jaa.eñ

jo donoñ samt se sāya-fagan peḌoñ tale bhī chilchilātī dhuup phailī ho

jahāñ har roz jaanā ho

to raste ruuTh jaate haiñ

agar pamal rahon par qadam rakhne ki aadat KHatm ho jae

masham-e-jaan mein KHushbu ki bajae dard dar aae

visal aamada shah-rahon pe furqat ka basera ho

ek aisa waqt aa jae

jo tera ho na mera ho

mohabbat ki sunahri jhil par gham ki ghaneri raat chhai ho

kinaron par faqat nam-dida tanhai ki kai ho

chamakte paniyon par thartharaate aks kho jaen

ru-pahli dhup mein sarsabz pagDanDi achanak zard paD jae

samundar ki namida ret par naqsh-e-qadam lahren nigal jaen

wo aankhen jin mein sat-range sajile KHwab rahte hain

wahan aaseb bas jaen

jo donon samt se saya-fagan peDon tale bhi chilchilati dhup phaili ho

jahan har roz jaana ho

to raste ruTh jate hain