raushni gul na karo

raushnī gul na karo varna kisī sog kā zahr

in darīchoñ ke hasīñ rang pe chhā jā.egā

saḳht-jāñ kohr kī mānind fazāoñ kā sukūt

nik.hat-o-nūr ke āhang pe chhā jā.egā

ruuh meñ tairtā jaatā hai ujāloñ kā surūr

jaise in sham.oñ kī ek ek kiran saaqī hai

abhī Dhalkā hī kahāñ pichhle pahar kā āñchal

raushnī gul na karo raat abhī baaqī hai

nuqra.ī kirnoñ ke gahvāre meñ soī huī raat

jaane kyā hai ki har āvāz pe chauñk uThtī hai

ajnabī ban ke bulātā hai dhaḌaktā huā dil

zindagī apne hī andāz pe chauñk uThtī hai

raushnī gul na karo varna ye suune dar-o-bām

apne hī sāyoñ ke girdāb meñ chakrā.eñge

mirī duniyā se ye tham-tham ke guzarte lamhāt

dukh kī ghaḌiyoñ kī tarah aur bhī tham jā.eñge

aur be-ḳhvāb nigāhoñ kā taqāzā ye hai

munjamid lamhoñ kā shīrāza bikhartā jaa.e

sā.ateñ baḌhtī chalī jaa.eñ havā kī sūrat

bahtī naddī kī tarah vaqt guzartā jaa.e

dosto hamdamo jalne do ye sham.eñ varna

bahke lamhoñ kā qadam aur bahak jā.egā

muskurā.egā zubūñ-kār añdheroñ kā ġhurūr

vaqt kā qāfila raste se bhaTak jā.egā

vaqt kā qāfila bhaTkā to vo rangīñ lamha

muntazir jis kī hai ye raat na aa pā.egā

munjamid raat na pighlī to vo rangīñ lamha

dard kī barf meñ dam toḌ ke rah jā.egā

vaqt kī raah na roko na bujhāo sham.eñ

aks ujāloñ kā dar-o-bām pe lahrāne do

muntazir jis kī hai ye raat us ik lamhe ko

dil kī āġhosh-e-tamanna meñ simaT aane do

raushnī gul na karo varna vo lamha kyā hai

ūñghte ziine pe afsāne na kah pā.eñge

bol pā.egā na chilman kā pur-asrār sukūt

bām-o-dar raat kā muñh dekhte rah jā.eñge

tīrgī chhā.ī to zulfoñ kā mahaktā jaadū

bhuul jaa.e na kahīñ raah mire shānoñ kī

raushnī hī jinheñ parvān chaḌhā saktī hai

surḳhiyāñ mujh se na chhin jaa.eñ in afsānoñ kī

raushnī gul na karo varna vo rangīñ lamha

dil kī āġhosh-e-tamannā meñ na aa pā.egā

sahn ke qadmoñ pe zīnoñ kī jabīñ hai lekin

tīrgī chhā.ī to ye fāsla baḌh jā.egā

baat maano ki añdhere ke thapeḌe khā kar

merī ummīdoñ ke fānūs bhī bujh jā.eñge

raushnī gul na karo varna vo lamha kyā hai

ūñghte ziine pe afsāna na kah pā.eñge

tīrgī chhā.ī to phir sub.h na ho pā.egī

raat ke baa'd phir ik raat chalī aa.egī

raushni gul na karo warna kisi sog ka zahr

in darichon ke hasin rang pe chha jaega

saKHt-jaan kohr ki manind fazaon ka sukut

nikhat-o-nur ke aahang pe chha jaega

ruh mein tairta jata hai ujalon ka surur

jaise in shamon ki ek ek kiran saqi hai

abhi Dhalka hi kahan pichhle pahar ka aanchal

raushni gul na karo raat abhi baqi hai

nuqrai kirnon ke gahware mein soi hui raat

jaane kya hai ki har aawaz pe chaunk uThti hai

ajnabi ban ke bulata hai dhaDakta hua dil

zindagi apne hi andaz pe chaunk uThti hai

raushni gul na karo warna ye sune dar-o-baam

apne hi sayon ke girdab mein chakraenge

meri duniya se ye tham-tham ke guzarte lamhat

dukh ki ghaDiyon ki tarah aur bhi tham jaenge

aur be-KHwab nigahon ka taqaza ye hai

munjamid lamhon ka shiraaza bikharta jae

saaten baDhti chali jaen hawa ki surat

bahti naddi ki tarah waqt guzarta jae

dosto hamdamo jalne do ye shamen warna

bahke lamhon ka qadam aur bahak jaega

muskuraega zubun-kar andheron ka ghurur

waqt ka qafila raste se bhaTak jaega

waqt ka qafila bhaTka to wo rangin lamha

muntazir jis ki hai ye raat na aa paega

munjamid raat na pighli to wo rangin lamha

dard ki barf mein dam toD ke rah jaega

waqt ki rah na roko na bujhao shamen

aks ujalon ka dar-o-baam pe lahrane do

muntazir jis ki hai ye raat us ek lamhe ko

dil ki aaghosh-e-tamanna mein simaT aane do

raushni gul na karo warna wo lamha kya hai

unghte zine pe afsane na kah paenge

bol paega na chilman ka pur-asrar sukut

baam-o-dar raat ka munh dekhte rah jaenge

tirgi chhai to zulfon ka mahakta jadu

bhul jae na kahin rah mere shanon ki

raushni hi jinhen parwan chaDha sakti hai

surKHiyan mujh se na chhin jaen in afsanon ki

raushni gul na karo warna wo rangin lamha

dil ki aaghosh-e-tamanna mein na aa paega

sahn ke qadmon pe zinon ki jabin hai lekin

tirgi chhai to ye fasla baDh jaega

baat mano ki andhere ke thapeDe kha kar

meri ummidon ke fanus bhi bujh jaenge

raushni gul na karo warna wo lamha kya hai

unghte zine pe afsana na kah paenge

tirgi chhai to phir subh na ho paegi

raat ke ba'd phir ek raat chali aaegi