raushni se bhara shahr

raushnī se bharā ik shahr dekhiye

dil meñ saare añdhere chhupā.e hue

kone meñ katre meñ kachre ke Dhere

saḌī tang galiyoñ meñ badbū ke Dere

dhasaktī dīvāroñ ke pur-ḳhauf ghere

thakī zard āñkhoñ ke bīmār chehre

jin ko sadiyāñ huiiñ muskurā.e hue

raushnī se bharā ik shahr

jahāñ naunihāloñ meñ bachpan nahīñ hai

javānī jahāñ khilkhilātī nahīñ hai

jahāñ aadmī aadmī sā nahīñ hai

jahāñ zindagī zindagī hī nahīñ hai

ḳhushī chhup ga.ī muñh churā.e hue

raushnī se bharā ik shahr

irādoñ se ūñchī imārat jahāñ pe

sadiyoñ se lambī haiñ saḌkeñ jahāñ pe

bhaTakte hue phir bhī haiñ sab yahāñ pe

ye kis kā shahr hai haiñ kyuuñ sab yahāñ pe

ki hausle sab ke haiñ charmarā.e hue

raushnī se bharā ik shahar

ye hiire kā byopār shīshe se kar deñ

ye maaoñ ko biibī ko nīlam kar deñ

milāte hue haath kab vaar kar deñ

do Take meñ ye bastī ko barbād kar deñ

sāhab-e-dahr ban ke phirte haiñ ye jo

ḳhazāne haiñ sab ke churā.e hue

raushnī se bharā ik shahr

raushnī ke tale un añdheroñ meñ gum

sahte hue laakh zulm-o-sitam

sahī log bhī haiñ vale haiñ ye kam

jo koshish meñ haiñ ki miTā deñ ye tam

ummīdeñ sabhī un se haiñ lagā.e hue

raushnī se bharā ik shahr

raushni se bhara ek shahr dekhiye

dil mein sare andhere chhupae hue

kone mein katre mein kachre ke Dhere

saDi tang galiyon mein badbu ke Dere

dhasakti diwaron ke pur-KHauf ghere

thaki zard aankhon ke bimar chehre

jin ko sadiyan huin muskurae hue

raushni se bhara ek shahr

jahan naunihaalon mein bachpan nahin hai

jawani jahan khilkhilati nahin hai

jahan aadmi aadmi sa nahin hai

jahan zindagi zindagi hi nahin hai

KHushi chhup gai munh churae hue

raushni se bhara ek shahr

iradon se unchi imarat jahan pe

sadiyon se lambi hain saDken jahan pe

bhaTakte hue phir bhi hain sab yahan pe

ye kis ka shahr hai hain kyun sab yahan pe

ki hausle sab ke hain charmarae hue

raushni se bhara ek shahar

ye hire ka byopar shishe se kar den

ye maon ko bibi ko nilam kar den

milate hue hath kab war kar den

do Take mein ye basti ko barbaad kar den

sahab-e-dahr ban ke phirte hain ye jo

KHazane hain sab ke churae hue

raushni se bhara ek shahr

raushni ke tale un andheron mein gum

sahte hue lakh zulm-o-sitam

sahi log bhi hain wale hain ye kam

jo koshish mein hain ki miTa den ye tam

ummiden sabhi un se hain lagae hue

raushni se bhara ek shahr