rawangi

jahāñ pe maiñ huuñ

bas ek kuhra-zada fazā hai

jidhar bhī dekho safed chādar Tañgī huī hai

nahīñ hai koī zamīn aisī ki jis pe meñ apne paañv rakhūñ

buland-o-bālā pahāḌoñ se

hazāroñ patthar luḌhak rahe haiñ

aur āñdhiyāñ sīTiyāñ bajātī guzar rahī haiñ

qadīm bhūrī pahāḌiyoñ se vo kārvāñ bhī to TuuT aayā

talāsh meñ jo na jaane kis kī bahut dinoñ se bhaTak rahā thā

vo garz-bardār sab farishte bhī mar chuke haiñ

jo ḳhair-o-shar par nigāh rakhne ke vāste the

koī bhī mīzān nek-o-bad kī nahīñ hai qaa.em

yahāñ ab apne qayām kī koī saa.at mo'atabar nahīñ hai

uThāo sāhil se kashtiyoñ ko

bahāo kā vaqt ho gayā hai

jahan pe main hun

bas ek kuhra-zada faza hai

jidhar bhi dekho safed chadar Tangi hui hai

nahin hai koi zamin aisi ki jis pe mein apne panw rakhun

buland-o-baala pahaDon se

hazaron patthar luDhak rahe hain

aur aandhiyan siTiyan bajati guzar rahi hain

qadim bhuri pahaDiyon se wo karwan bhi to TuT aaya

talash mein jo na jaane kis ki bahut dinon se bhaTak raha tha

wo garz-bardar sab farishte bhi mar chuke hain

jo KHair-o-shar par nigah rakhne ke waste the

koi bhi mizan nek-o-bad ki nahin hai qaem

yahan ab apne qayam ki koi saat mo'atabar nahin hai

uThao sahil se kashtiyon ko

bahao ka waqt ho gaya hai