registan mein jhil

sunā karte the ab tak

regzāroñ meñ kahīñ bhī duur tak

paanī nahīñ miltā

magar ik baar jab ham

ret ke jalte hue zarroñ pe nange paañv chal kar

lahū barsāte sūraj se nigāheñ chaar karte

paañv meñ chhāle sajā.e

paanī ke chand ek qatre DhūñDte

qadam aage baḌhā.e jā rahe the

lahū kī tez baḌhtī gardisheñ

maddham se maddham-tar hī hotī jā rahī thiiñ

zindagī mādūm hotī jā rahī thiiñ

achānak hairatoñ meñ Duub kar ham ne ye dekhā

ik baḌī jaadū bharī sī jhiil hai

jis meñ ki tā-hadd-e-nazar

qaus-o-quzah ke rang bikhre haiñ

ubhartī Dūbtī lahreñ

baḌā jaadū jagātī raqs kartī

nāchtī lahreñ

samundar sabz lahreñ nīlgūñ lahreñ

safed aur champa.ī lahreñ

aur un ke bhī sivā

baḌī hī siyāh gahrī surmagīñ lahreñ

jhiil kī lahroñ kā jaadū

ruuh ko sarshār sā kartā rahā

ziist ke ġham kā mudāvā ban gayā

kināre baiTh kar

us jhiil ke paanī meñ ham ne der tak jhāñkā

ḳhud apne aap se milte rahe

ḳhud apne aap ko pahchānñe kī koshish karte rahe

suna karte the ab tak

regzaron mein kahin bhi dur tak

pani nahin milta

magar ek bar jab hum

ret ke jalte hue zarron pe nange panw chal kar

lahu barsate suraj se nigahen chaar karte

panw mein chhaale sajae

pani ke chand ek qatre DhunDte

qadam aage baDhae ja rahe the

lahu ki tez baDhti gardishen

maddham se maddham-tar hi hoti ja rahi thin

zindagi madum hoti ja rahi thin

achanak hairaton mein Dub kar hum ne ye dekha

ek baDi jadu bhari si jhil hai

jis mein ki ta-hadd-e-nazar

qaus-o-quzah ke rang bikhre hain

ubharti Dubti lahren

baDa jadu jagati raqs karti

nachti lahren

samundar sabz lahren nilgun lahren

safed aur champai lahren

aur un ke bhi siwa

baDi hi siyah gahri surmagin lahren

jhil ki lahron ka jadu

ruh ko sarshaar sa karta raha

zist ke gham ka mudawa ban gaya

kinare baiTh kar

us jhil ke pani mein hum ne der tak jhanka

KHud apne aap se milte rahe

KHud apne aap ko pahchanne ki koshish karte rahe