renge lamhon ka KHauf

maiñ atom-bomb ke Dher pe baiThā soch rahā thā

ye raushniyoñ aur rañgoñ kā sailāb-e-ravāñ

ye resham ke lachchhoñ aisā narm badan

ye barf ke gaale se is nanhe seb kī niiñd

ye us kī farishtoñ jaisī māsūmāna hañsī

ye gandum ke dānoñ se nanhe nanhe daañt

ye kaliyoñ kī mānind tar-o-tāza ruḳhsār

ye gesūñ kī ḳhushbū se nā-vāqif naak

ye cigarette ke dhueñ se begāna dahan

ye mere apne dil sī kushāda peshānī

ye sub.h kī pahlī kirnoñ jaise us ke baal

ye sab kuchh us kā apnā hai lekin phir bhī

ye sab kuchh āḳhir kab tak us kā apnā hai

ye merā apnā ḳhuun hai mere hāthoñ meñ

yā merī sahmī sahmī be-ḳhvāb āñkhoñ meñ

ye mustaqbil kā koī bhayānak sapnā hai

maiñ ḳhud apnī hī sochoñ ke par noch rahā thā

maiñ atom-bomb ke Dher pe baiThā soch rahā thā

main atom-bomb ke Dher pe baiTha soch raha tha

ye raushniyon aur rangon ka sailab-e-rawan

ye resham ke lachchhon aisa narm badan

ye barf ke gale se is nanhe seb ki nind

ye us ki farishton jaisi masumana hansi

ye gandum ke danon se nanhe nanhe dant

ye kaliyon ki manind tar-o-taza ruKHsar

ye gesun ki KHushbu se na-waqif nak

ye cigarette ke dhuen se begana dahan

ye mere apne dil si kushada peshani

ye subh ki pahli kirnon jaise us ke baal

ye sab kuchh us ka apna hai lekin phir bhi

ye sab kuchh aaKHir kab tak us ka apna hai

ye mera apna KHun hai mere hathon mein

ya meri sahmi sahmi be-KHwab aankhon mein

ye mustaqbil ka koi bhayanak sapna hai

main KHud apni hi sochon ke par noch raha tha

main atom-bomb ke Dher pe baiTha soch raha tha