ret ka sahra

jab ret kā sahrā dekh ke Dar jaatā hai adiib kā siina bhī

vo lamhe aksar aate haiñ

jab zehn ke saare parde aTke aTke se rah jaate haiñ

jab shor machātī shāḳh-e-zabāñ se saare parinde mar mar ke

gir jaate haiñ

vo lamhe aksar aate haiñ

jab āvāzoñ ke pinjar

apne sūkhe sūkhe haath liye

mere sar par chhā jaate haiñ

aur maiñ ghabrā sā jaatā huuñ

ik qabristān kī tanhā.ī

ik be-ma.anī ḳhālī rasta

aur do paañv kī ḳhālī ḳhālī thakī thakī sī chaap

to apne-āp se bhī Dar jaatā huuñ

jab ret kā sahrā dekh ke Dar jaatā hai qalam kā siina bhī

vo lamhe aksar aate haiñ

jab ret ka sahra dekh ke Dar jata hai adib ka sina bhi

wo lamhe aksar aate hain

jab zehn ke sare parde aTke aTke se rah jate hain

jab shor machati shaKH-e-zaban se sare parinde mar mar ke

gir jate hain

wo lamhe aksar aate hain

jab aawazon ke pinjar

apne sukhe sukhe hath liye

mere sar par chha jate hain

aur main ghabra sa jata hun

ek qabristan ki tanhai

ek be-mani KHali rasta

aur do panw ki KHali KHali thaki thaki si chap

to apne-ap se bhi Dar jata hun

jab ret ka sahra dekh ke Dar jata hai qalam ka sina bhi

wo lamhe aksar aate hain