ret

ret par soyā huā hai aadmī

us meñ sire se koī jumbish hī nahīñ

mujhe haul hotā hai

maiñ us ke paas jaatā huuñ

vahāñ ret kā ek Dher hotā hai

maiñ us Dher ko haath se chhūtā huuñ

mere panje kā nishān ret par ban jaatā hai

phir ye nishān

paanī se niklī huī machhlī kī tarah taḌapne lagtā hai

aur kuchh der ba.ad sākit ho jaatā hai

mere haath se chipkī ret

jab mere saath saath chaltī rahī hai

maiñ ne use ka.ī baar haath se jhāḌnā chāhā

baar baar haath ko paanī se dhoyā bhī

lekin ret haath se chhūTtī hī nahīñ

raah chalte hue maiñ apnā haath

jeb maiñ chhupā kar chaltā huuñ

lekin musāfah karne ke liye to

haath jeb se nikālnā hī paḌtā hai

mujh se musāfh karne ke ba.ad

koī aadmī pahle jaisā nahīñ rahtā

kuchh duur jā kar

vo apne haath se lagī ret ko

jhāḌne kī koshish kartā hai

aur ret ke Dher meñ tabdīl ho jaatā hai

har galī aur mohalle meñ

har ghar kī dahlīz par

aap ko ret ke ye Dher dikhā.ī deñge

un par merī uñgliyoñ ke nishān bhī mileñge

ḳhud merī piiTh par bhī

aisā hī ek nishān hai

ek din ye saare Dher yakjā kar diye jā.eñge

ek baḌā sā Dher banā diyā jā.egā

ye saarā kaam

ek shaḳhs tan-e-tanhā karegā

phir vo Dher par bane us nishān ko

uThā kar apnī jeb meñ rakh legā

ret par soya hua hai aadmi

us mein sire se koi jumbish hi nahin

mujhe haul hota hai

main us ke pas jata hun

wahan ret ka ek Dher hota hai

main us Dher ko hath se chhuta hun

mere panje ka nishan ret par ban jata hai

phir ye nishan

pani se nikli hui machhli ki tarah taDapne lagta hai

aur kuchh der baad sakit ho jata hai

mere hath se chipki ret

jab mere sath sath chalti rahi hai

main ne use kai bar hath se jhaDna chaha

bar bar hath ko pani se dhoya bhi

lekin ret hath se chhuTti hi nahin

rah chalte hue main apna hath

jeb main chhupa kar chalta hun

lekin musafah karne ke liye to

hath jeb se nikalna hi paDta hai

mujh se musafh karne ke baad

koi aadmi pahle jaisa nahin rahta

kuchh dur ja kar

wo apne hath se lagi ret ko

jhaDne ki koshish karta hai

aur ret ke Dher mein tabdil ho jata hai

har gali aur mohalle mein

har ghar ki dahliz par

aap ko ret ke ye Dher dikhai denge

un par meri ungliyon ke nishan bhi milenge

KHud meri piTh par bhi

aisa hi ek nishan hai

ek din ye sare Dher yakja kar diye jaenge

ek baDa sa Dher bana diya jaega

ye sara kaam

ek shaKHs tan-e-tanha karega

phir wo Dher par bane us nishan ko

uTha kar apni jeb mein rakh lega