rishta

tujhe bhī yaad aatā hogā shāyad

thā merī ruuh se ik dil kā rishta

vo rishta jis ke aage saare rishte

lagā karte haiñ jhūTe aur phīke

vahī rishta hai mere saath ab tak

mirī rag rag meñ har dam dauḌtā hai

mire andar jo ḳhālī-pan hai chhāyā

use pur karne kī koshish meñ har pal

mirī ḳhāmoshiyoñ ko toltā hai

mirī āsūdgī-e-jāñ kī ḳhātir

bahut mīThe suroñ meñ boltā hai

magar phir bhī maiñ kaise bhuul jā.ūñ

ye rishta merī barbādī kī jaḌ hai

yahī vo rishta hai jo toḌ kar tū

mirī duniyā se kab kā jā chukā hai

tujhe bhi yaad aata hoga shayad

tha meri ruh se ek dil ka rishta

wo rishta jis ke aage sare rishte

laga karte hain jhuTe aur phike

wahi rishta hai mere sath ab tak

meri rag rag mein har dam dauDta hai

mere andar jo KHali-pan hai chhaya

use pur karne ki koshish mein har pal

meri KHamoshiyon ko tolta hai

meri aasudgi-e-jaan ki KHatir

bahut miThe suron mein bolta hai

magar phir bhi main kaise bhul jaun

ye rishta meri barbaadi ki jaD hai

yahi wo rishta hai jo toD kar tu

meri duniya se kab ka ja chuka hai