sadgi

mere maazī kā koī zaḳhm mire paas nahīñ

jis se jo chiiz milī thī use pher aaya huuñ

terī zulfoñ ke sitāre tirī āġhosh ke phuul

jaane kin rāh-guzāroñ meñ bikher aaya huuñ

ho ga.ī hogī buland aur buland aur buland

maiñ tire gird jo dīvār sī gher aaya huuñ

tū mirī raah se guzrī thī sitāre le kar

mere ehsās pe chhā.e hue saa.e na ga.e

terī āñkhoñ se to barsī thī mai-e-hosh-rubā

ḳhushk hoñToñ se ye paimāne lagā.e na ga.e

terī phailī huī bāñhoñ ne pukārā lekin

do qadam mujh se tirī samt uThā.e na ga.e

maiñ ne alfāz ke parde meñ mohabbat DhūñDī

irti.āsh-e-lab-e-gul-gūñ kī sadā sun na sakā

maiñ na samjhā tirī ḳhāmosh nazar kā mafhūm

āñkhoñ āñkhoñ meñ vo iqrār-e-vafā sun na sakā

maiñ ne andāz-e-tamannā ko taġhāful jaanā

terī bhīgī huī palkoñ kā gila sun na sakā

aaj jab zaḳhm-e-tamannā kā nishāñ tak na rahā

to mujhe zaḳhm-e-tamannā kī davā yaad aa.ī

ḳhaak uḌne lagī jab ruuh ke vīrāne meñ

terī bikhrī huī zulfoñ kī ghaTā yaad aa.ī

aaj jab suukh ga.e phuul hī armānoñ ke

tere mahke hue āñchal kī havā yaad aa.ī

mere mazi ka koi zaKHm mere pas nahin

jis se jo chiz mili thi use pher aaya hun

teri zulfon ke sitare teri aaghosh ke phul

jaane kin rah-guzaron mein bikher aaya hun

ho gai hogi buland aur buland aur buland

main tere gird jo diwar si gher aaya hun

tu meri rah se guzri thi sitare le kar

mere ehsas pe chhae hue sae na gae

teri aankhon se to barsi thi mai-e-hosh-ruba

KHushk honTon se ye paimane lagae na gae

teri phaili hui banhon ne pukara lekin

do qadam mujh se teri samt uThae na gae

main ne alfaz ke parde mein mohabbat DhunDi

irtiash-e-lab-e-gul-gun ki sada sun na saka

main na samjha teri KHamosh nazar ka mafhum

aankhon aankhon mein wo iqrar-e-wafa sun na saka

main ne andaz-e-tamanna ko taghaful jaana

teri bhigi hui palkon ka gila sun na saka

aaj jab zaKHm-e-tamanna ka nishan tak na raha

to mujhe zaKHm-e-tamanna ki dawa yaad aai

KHak uDne lagi jab ruh ke virane mein

teri bikhri hui zulfon ki ghaTa yaad aai

aaj jab sukh gae phul hi armanon ke

tere mahke hue aanchal ki hawa yaad aai