sal-e-nau

aao ham jashn manā.eñ ki ye dhartī apnī

ye jahāñ-dīda mu'ammar dhartī

is kī zulfoñ kī siyāhī meñ baḌhā

ek aur tār-e-safed

jhurriyāñ chehre kī hairānī nigāhoñ meñ samo.e dekheñ

tez-rau qadmoñ se baḌhtī huī ik aur shikan

jaise bichhḌī ho kisī mele meñ

dil kī shiryānoñ meñ surḳhī kī jagah zardī hai

raushnī-rang ke tūfān meñ fursat kis ko

koī pūchhe us se

dil kī raftār huī jaatī hai dhīmī kyūñkar

us ke siine meñ haiñ madfūn dukhoñ ke ambār

apnī hī kokh se janme in zamīñ-zādoñ ke

qahqahe khokhle sun sun ke phaTā jaatā hai dil dhartī kā

aur vo sochtī hai

kho ga.e kyoñ vo shab-o-roz mire

merī bāhoñ meñ humakte the vo tifl-e-māsūm

jin ke hoñToñ pe tabassum ke tilā.ī sikke

aur āñkhoñ meñ thiiñ ḳhvāboñ kī rupahlī kirneñ

dil ke goshoñ meñ umangoñ kī dhanak phailī thī

aur ab haal ye hai

un ke hoñToñ pe khanakte hue sikke jā’lī

ḳhushbueñ tez magar rang jhūTe

raat ke pichhle pahar chīḳhte haiñ

ruuh se 'aarī haiñ pinjar un ke

ḳhauf anhonī kā bechain kiye rahtā hai

bad-nazar koī lagī khā ga.ī ḳhushiyāñ un kī

mere ḳhāliq mirī takvīn ke māhir fankār

is na.e saal meñ vāpas kar de

un kī āñkhoñ kī chamak hiire sī

un ke hoñToñ kī hañsī motī sī

aao hum jashn manaen ki ye dharti apni

ye jahan-dida mu'ammar dharti

is ki zulfon ki siyahi mein baDha

ek aur tar-e-safed

jhurriyan chehre ki hairani nigahon mein samoe dekhen

tez-rau qadmon se baDhti hui ek aur shikan

jaise bichhDi ho kisi mele mein

dil ki shiryanon mein surKHi ki jagah zardi hai

raushni-rang ke tufan mein fursat kis ko

koi puchhe us se

dil ki raftar hui jati hai dhimi kyunkar

us ke sine mein hain madfun dukhon ke ambar

apni hi kokh se janme in zamin-zadon ke

qahqahe khokhle sun sun ke phaTa jata hai dil dharti ka

aur wo sochti hai

kho gae kyon wo shab-o-roz mere

meri bahon mein humakte the wo tifl-e-masum

jin ke honTon pe tabassum ke tilai sikke

aur aankhon mein thin KHwabon ki rupahli kirnen

dil ke goshon mein umangon ki dhanak phaili thi

aur ab haal ye hai

un ke honTon pe khanakte hue sikke ja’li

KHushbuen tez magar rang jhuTe

raat ke pichhle pahar chiKHte hain

ruh se 'ari hain pinjar un ke

KHauf anhoni ka bechain kiye rahta hai

bad-nazar koi lagi kha gai KHushiyan un ki

mere KHaliq meri takwin ke mahir fankar

is nae sal mein wapas kar de

un ki aankhon ki chamak hire si

un ke honTon ki hansi moti si