sanp kamra aur main

tañg kamre meñ kuchh saañp haiñ

aur maiñ

farsh par laal āñkheñ dikhāte hue surḳh añgāroñ se

ḳhud ko mahfūz rakhne meñ masrūf huuñ

aur kamre kī chhat

raushnī kī lakīreñ sameTe khaḌī hai

ġharaz

paañv ko surḳh añgāroñ se

sar ko chubhtī huī raushnī kī lakīroñ se mahfūz rakhne meñ maiñ

munhamik huuñ

kaale piile hare

saañp bhī

mujh ko Dasne chale aa rahe haiñ

magar meñ unheñ maar Dālūñgā ik din ye mujh ko yaqīñ hai

phir achānak maiñ ye sochtā huuñ

mere kamre meñ rauzan nahīñ hai koī

jis se bād-e-sabā chupke dar aa ke sho.aloñ ko dahkā sake

bulb ḳhāmosh hai

phir bhalā saañp kyuuñ ā.eñge

jism se vasvasoñ kī ye bosīda chādar haTā kar

sāf-suthre se bistar pe maiñ so rahā huuñ

kyuuñ ki pichhle janam se maiñ nirdosh huuñ

mirā tañg kamra

mujhe der se tak rahā hai

tang kamre mein kuchh sanp hain

aur main

farsh par lal aankhen dikhate hue surKH angaron se

KHud ko mahfuz rakhne mein masruf hun

aur kamre ki chhat

raushni ki lakiren sameTe khaDi hai

gharaz

panw ko surKH angaron se

sar ko chubhti hui raushni ki lakiron se mahfuz rakhne mein main

munhamik hun

kale pile hare

sanp bhi

mujh ko Dasne chale aa rahe hain

magar mein unhen mar Dalunga ek din ye mujh ko yaqin hai

phir achanak main ye sochta hun

mere kamre mein rauzan nahin hai koi

jis se baad-e-saba chupke dar aa ke shoalon ko dahka sake

bulb KHamosh hai

phir bhala sanp kyun aaenge

jism se waswason ki ye bosida chadar haTa kar

saf-suthre se bistar pe main so raha hun

kyun ki pichhle janam se main nirdosh hun

mera tang kamra

mujhe der se tak raha hai