sarban

sārbāñ nikle the jis vaqt gharoñ se apne

āshiyānoñ ko parinde bhī nahīñ chhoḌte jab

rāste

rastoñ kī āġhosh hī meñ so.e the

aur havā

sabz pahāḌoñ se nahīñ utrī thī

āsmāñ par abhī tāroñ kī sajī thī mahfil

sārbāñ nikle the jis vaqt gharoñ se apne

rañg ḳhvāboñ meñ abhī ghulte the

jism meñ vasl kī lazzat kā nasha baaqī thā

garm bistar meñ

''gul-e-ḳhūbī'' pareshāñ thī abhī

duudh se ḳhuub bharā

ek kaTorā thā tipā.ī pe dharā

sārbāñ nikle the jis vaqt safar par apne

chār-sū gahrī ḳhamoshī thī

chāñdnī riit ke siine pe abhī soī thī

aur dhīre se

sabā ḳhushbueñ bikhrātī thī

os se bhīgī huī

ghaas kī har pattī jhukī jaatī thī

raat ke niil meñ kuchh nuur ghulā jaatā thā

ye jahāñ ā.īna-ḳhāna sā nazar aatā thā

sārbāñ gahrī ḳhamoshī meñ gharoñ se nikle

lau charāġhoñ kī unheñ jhāñktī thī

dhuul qadmoñ se lipaTte hue ye kahtī thii:

tum kahīñ jaao na abhī

saa.e ashjār se rastoñ pe utar aa.e the

dar-o-dīvār ḳhamoshī se the fariyād-kunāñ

thiiñ jugālī meñ magan ūñTniyāñ

ghanTiyāñ jāgtī thiiñ

lazzat-e-vasl se mad.hosh havā jāgtī thī

pañkhuḌī hoñToñ pe ḳhāmosh duā jāgtī thī

chār-sū gahrī ḳhamoshī thī

fazā jāgtī thī

sārbāñ nikle the jis vaqt safar par apne

sarban nikle the jis waqt gharon se apne

aashiyanon ko parinde bhi nahin chhoDte jab

raste

raston ki aaghosh hi mein soe the

aur hawa

sabz pahaDon se nahin utri thi

aasman par abhi taron ki saji thi mahfil

sarban nikle the jis waqt gharon se apne

rang KHwabon mein abhi ghulte the

jism mein wasl ki lazzat ka nasha baqi tha

garm bistar mein

gul-e-KHubi pareshan thi abhi

dudh se KHub bhara

ek kaTora tha tipai pe dhara

sarban nikle the jis waqt safar par apne

chaar-su gahri KHamoshi thi

chandni rit ke sine pe abhi soi thi

aur dhire se

saba KHushbuen bikhraati thi

os se bhigi hui

ghas ki har patti jhuki jati thi

raat ke nil mein kuchh nur ghula jata tha

ye jahan aaina-KHana sa nazar aata tha

sarban gahri KHamoshi mein gharon se nikle

lau charaghon ki unhen jhankti thi

dhul qadmon se lipaTte hue ye kahti thi:

tum kahin jao na abhi

sae ashjar se raston pe utar aae the

dar-o-diwar KHamoshi se the fariyaad-kunan

thin jugali mein magan unTniyan

ghanTiyan jagti thin

lazzat-e-wasl se madhosh hawa jagti thi

pankhuDi honTon pe KHamosh dua jagti thi

chaar-su gahri KHamoshi thi

faza jagti thi

sarban nikle the jis waqt safar par apne