sawan

sāvan kā mahīna ye rim-jhim ghanghor ghaTā.eñ kyā kahnā

ehsās kī shiddat dil muztar bechain nigāheñ kyā kahnā

chham-chham kī sadā ye uudī ghaTā bikhre hue motī sabze par

kaliyoñ kā tabassum gul raqsāñ pī pī kī sadā.eñ kyā kahnā

dil un kī mohabbat pe nāzāñ maiñ aise tasavvur ke sadqe

vo saath haiñ sāhil hai maiñ huuñ bāñhoñ meñ haiñ bāñheñ kyā kahnā

jī chāhtā hai is 'ālam meñ kuchh apnī kaheñ kuchh un kī suneñ

vaise to vo aate rahte haiñ aise meñ jo aa.eñ kyā kahnā

har roz tasavvur meñ aksar hotī haiñ mulāqāteñ un se

taskīn-e-nazar ho jaatī hai vo aa.eñ na aa.eñ kyā kahnā

sawan ka mahina ye rim-jhim ghanghor ghaTaen kya kahna

ehsas ki shiddat dil muztar bechain nigahen kya kahna

chham-chham ki sada ye udi ghaTa bikhre hue moti sabze par

kaliyon ka tabassum gul raqsan pi pi ki sadaen kya kahna

dil un ki mohabbat pe nazan main aise tasawwur ke sadqe

wo sath hain sahil hai main hun banhon mein hain banhen kya kahna

ji chahta hai is 'alam mein kuchh apni kahen kuchh un ki sunen

waise to wo aate rahte hain aise mein jo aaen kya kahna

har roz tasawwur mein aksar hoti hain mulaqaten un se

taskin-e-nazar ho jati hai wo aaen na aaen kya kahna