saya-e-gurezan

dil hī to hai na sañg-o-ḳhisht

dard se bhar gayā bahut

ro.e haiñ ham hazār baar

dar pe tumhāre baiTh ke

chilman uThā ke ek din

dekhā nahīñ janāb ne

dair nahīñ haram nahīñ dar nahīñ āstāñ nahīñ

baiThe haiñ rahguzar pe ham

shāyad janāb kā guzar is rahguzar se ho kabhī

ham dekh leñge gar tumheñ

āñkhoñ meñ diid aa.egī

ham ko naved-e-amn kī thoḌī sī bhiik chāhiye

thoḌā sā tum ko dekh ke

halchaleñ machī haiñ jo sīna-e-soz meñ bahut

thoḌā sā chain pā.eñgī

vā hasratā ki yaar ne khīñchā sitam se apnā haath

ham ko harīs-e-lazzat-e-āzār soch ke

aur is fareb meñ vo ḳhud

ik raat ḳhvāb meñ aa ga.e

bosa diyā sharāb bhī dī

āñkhoñ ko chuum chuum kar ham se kahā

ki ab to vahshat-e-dil-o-dimāġh

ātish meñ jā ke pheñk de

ab bhī sañbhal vagarna phir

ik aisī shab bhī aa.egī

sāya-e-gurezāñ ho ke jab

tujh ko vo chhoḌ jā.egā

dil hi to hai na sang-o-KHisht

dard se bhar gaya bahut

roe hain hum hazar bar

dar pe tumhaare baiTh ke

chilman uTha ke ek din

dekha nahin janab ne

dair nahin haram nahin dar nahin aastan nahin

baiThe hain rahguzar pe hum

shayad janab ka guzar is rahguzar se ho kabhi

hum dekh lenge gar tumhein

aankhon mein did aaegi

hum ko nawed-e-amn ki thoDi si bhik chahiye

thoDa sa tum ko dekh ke

halchalen machi hain jo sina-e-soz mein bahut

thoDa sa chain paengi

wa hasrata ki yar ne khincha sitam se apna hath

hum ko haris-e-lazzat-e-azar soch ke

aur is fareb mein wo KHud

ek raat KHwab mein aa gae

bosa diya sharab bhi di

aankhon ko chum chum kar hum se kaha

ki ab to wahshat-e-dil-o-dimagh

aatish mein ja ke phenk de

ab bhi sanbhal wagarna phir

ek aisi shab bhi aaegi

saya-e-gurezan ho ke jab

tujh ko wo chhoD jaega