saya

din bhar ke masrūf qadam

jab lauT ke ghar ko aate haiñ

to

apne saath thake shānoñ par

shal hāthoñ kā baar uThā.e

bojhal āñkhoñ kī maddham bīnā.ī le kar

aao aazar sunñe kī ik halkī sī ummīd liye

ghar kī dahlīz pe ruk jaate haiñ

aur purānā darvāza

jab khultā hai to

sab mānūs darīche bāñheñ phailā kar

in qadmoñ kī aahaT par

aane vaale is paikar ko

shaam kī ḳhāmoshī meñ ishāre karte haiñ

kamre kī kursī ke sukūñ-parvar haiñ daste

bistar kī ujlī chādar hai dost-navāz

takiye kī narmī meñ hamdardī kī garmī

kuuT kuuT kar bharī huī hai

chāroñ or mire kamre meñ

ḳhushbū sī hai

jaise tumhārā

ik saaya sā

mere saath rahā kartā hai

din bhar ke masruf qadam

jab lauT ke ghar ko aate hain

to

apne sath thake shanon par

shal hathon ka bar uThae

bojhal aankhon ki maddham binai le kar

aao aazar sunne ki ek halki si ummid liye

ghar ki dahliz pe ruk jate hain

aur purana darwaza

jab khulta hai to

sab manus dariche banhen phaila kar

in qadmon ki aahaT par

aane wale is paikar ko

sham ki KHamoshi mein ishaare karte hain

kamre ki kursi ke sukun-parwar hain daste

bistar ki ujli chadar hai dost-nawaz

takiye ki narmi mein hamdardi ki garmi

kuT kuT kar bhari hui hai

chaaron or mere kamre mein

KHushbu si hai

jaise tumhaara

ek saya sa

mere sath raha karta hai