sabaq

kahīñ kahīñ pe harī sī shāḳheñ

haiñ apne ġhunchoñ pe muskurātī

kahīñ kahīñ pe haiñ sūkhe patte

udāsiyoñ ke sabaq sunāte

kahīñ kahīñ pe guloñ pe bhauñre

mohabbatoñ kī kahānī likhte

kahīñ kahīñ pe gulāb ishq ke

kitāb-e-dil meñ haiñ sūkhe milte

kahīñ pe dariyā kahīñ pe sahrā

kahīñ bahāreñ kahīñ ḳhizā.eñ

kahīñ tamāshā kahīñ ḳhāmoshī

kahīñ pe fasloñ kā lahlahānā

kahīñ pe banjar zamīñ Thikāna

kahīñ pe bārish qahr sī barse

kahīñ zamīñ ik qatre ko tarse

kahīñ fazāoñ meñ shoḳhiyāñ sī

kahīñ pe bikhrī udāsiyāñ sī

kisī kī āñkhoñ meñ mast jugnū

na.ī ibārat ke lafz likhte

kisī kī palkoñ pe ḳhvāb TuuTe

ajab udāsī meñ Duube Duube

ajab se manzar ajab se qisse

havāle mujh ko dikhā rahe haiñ

kahānī koī sunā rahe haiñ

sabaq ye mujh ko paḌhā rahe haiñ

kahin kahin pe hari si shaKHen

hain apne ghunchon pe muskuraati

kahin kahin pe hain sukhe patte

udasiyon ke sabaq sunate

kahin kahin pe gulon pe bhaunre

mohabbaton ki kahani likhte

kahin kahin pe gulab ishq ke

kitab-e-dil mein hain sukhe milte

kahin pe dariya kahin pe sahra

kahin bahaaren kahin KHizaen

kahin tamasha kahin KHamoshi

kahin pe faslon ka lahlahana

kahin pe banjar zamin Thikana

kahin pe barish qahr si barse

kahin zamin ek qatre ko tarse

kahin fazaon mein shoKHiyan si

kahin pe bikhri udasiyan si

kisi ki aankhon mein mast jugnu

nai ibarat ke lafz likhte

kisi ki palkon pe KHwab TuTe

ajab udasi mein Dube Dube

ajab se manzar ajab se qisse

hawale mujh ko dikha rahe hain

kahani koi suna rahe hain

sabaq ye mujh ko paDha rahe hain