safar aisa hai kahan ka

jis jahān meñ merī āvāz ne mujhe chhoḌā thā

vo ab merī samā.at se pare hai

mujhe kuchh sunā.ī nahīñ detā

mushkil ye hai ki aadmī bahut kuchh sun saktā na dekh saktā hai

phir bhī shāyad kuchh aisā hotā hai ki

kisī bhī marne vaale aadmī kī

āñkhoñ kī kagār par jab us kī

jaan Thahar jaatī hai

tū us ke naam kā parinda

use achānak uḌā le jaatā hai

ye maut hotī hai

sivā.e is ke ki marne vaalā use dekh nahīñ saktā

mujhe yaad nahīñ

ki maiñ ne kis se mohabbat kī

aur kis se nafrat kī

sivā.e is ke ki maiñ ne vo saare gunāh kiye

jo mujhe is liye yaad haiñ

ki ek umr tak unheñ

mujh meñ rachāyā basāyā aur khilāyā pilāyā gayā

mujhe yaad hai

ki maiñ ne koī aisī ġhizā nahīñ khaa.ī

jo merī ruuh meñ utar jaatī

mujhe yaad hai

ki maiñ ne koī aisā libās nahīñ pahnā

jo mere bātin meñ utar jaatā

maiñ zindagī bhar bhūkā rahā

aur nañgā rahā

yahāñ tak ki mere paas

rāh-e-haq meñ kuchh dene ke liye bhī nahīñ

na koī nekī na koī burā.ī

jis jahan mein meri aawaz ne mujhe chhoDa tha

wo ab meri samaat se pare hai

mujhe kuchh sunai nahin deta

mushkil ye hai ki aadmi bahut kuchh sun sakta na dekh sakta hai

phir bhi shayad kuchh aisa hota hai ki

kisi bhi marne wale aadmi ki

aankhon ki kagar par jab us ki

jaan Thahar jati hai

tu us ke nam ka parinda

use achanak uDa le jata hai

ye maut hoti hai

siwae is ke ki marne wala use dekh nahin sakta

mujhe yaad nahin

ki main ne kis se mohabbat ki

aur kis se nafrat ki

siwae is ke ki main ne wo sare gunah kiye

jo mujhe is liye yaad hain

ki ek umr tak unhen

mujh mein rachaya basaya aur khilaya pilaya gaya

mujhe yaad hai

ki main ne koi aisi ghiza nahin khai

jo meri ruh mein utar jati

mujhe yaad hai

ki main ne koi aisa libas nahin pahna

jo mere baatin mein utar jata

main zindagi bhar bhuka raha

aur nanga raha

yahan tak ki mere pas

rah-e-haq mein kuchh dene ke liye bhi nahin

na koi neki na koi burai