safar ka dusra marhala

chalī kab havā kab miTā naqsh-e-pā

kab girī ret kī vo ridā

jis meñ chhupte hue tū ne mujh se kahā

aage baḌh aage baḌhtā hī jā

muḌ ke takne kā ab fā.eda

koī chehra koī chaap maazī kī koī sadā kuchh nahīñ ab

ai gale ke tanhā muhāfiz tirā ab muhāfiz ḳhudā

mere hoñToñ pe kaf

mere ra.asha-zada bāzuoñ se laTaktī huī gosht kī dhajjiyāñ

aur lākhoñ baras kā buḌhāpā

jo mujh meñ samā kar humakne lagā

mujh ko maazī se kaTne kā kuchh Dar nahīñ

apne ham-zād ko rū-ba-rū pā ke maiñ ġham-zada bhī nahīñ

ye asā jhukte shānoñ pe kaalī abā aur gale ke chalne kā paiham sadā

ab yahī merī qismat yahī aasrā

chali kab hawa kab miTa naqsh-e-pa

kab giri ret ki wo rida

jis mein chhupte hue tu ne mujh se kaha

aage baDh aage baDhta hi ja

muD ke takne ka ab faeda

koi chehra koi chap mazi ki koi sada kuchh nahin ab

ai gale ke tanha muhafiz tera ab muhafiz KHuda

mere honTon pe kaf

mere rasha-zada bazuon se laTakti hui gosht ki dhajjiyan

aur lakhon baras ka buDhapa

jo mujh mein sama kar humakne laga

mujh ko mazi se kaTne ka kuchh Dar nahin

apne ham-zad ko ru-ba-ru pa ke main gham-zada bhi nahin

ye asa jhukte shanon pe kali aba aur gale ke chalne ka paiham sada

ab yahi meri qismat yahi aasra