safar raegan

ye pagDanDī

chalte chalte jañgal meñ se phirtī phirātī duur haiñ

ghane ghane peḌoñ meñ chhupe

ik mandir tak le jaatī hai

bahut purānī kā.ī-zada sī sīḌhī chaḌh kar

mandir meñ jab dāḳhil huuñ to

farsh ke uupar bikhre hue

kuchh piile patte milte haiñ

yā kahīñ kahīñ pe jaltī jaltī āñkhoñ vaale saañp dikhā.ī dete haiñ

dīvāroñ par naqsh purāne maddham maddham

bahut purāne qisse le kar jaag rahe haiñ

jin se kuchh anjānī sī ḳhushbueñ lipTī

haañp rahī haiñ

beach meñ ik asthān ke uupar

pyārī sī ik mūrat hai

jo janm janm se sochoñ ke pātāl meñ Duubī

jaag rahī hai

kabhī kabhī ik chhan-chhan chhan-chhan

havā meñ tairtī jaatī hai

aur haule haule siskī ban kar

bikhar bikhar sī jaatī hai

phir gahrī chup meñ kone se

chamgādaḌ koī uḌtī hai

to chup kī chīḳheñ

mandir kī har mūrat ko dahlātī haiñ

jaane kab se aisā hotā aayā hai

ye gūñgā mandir pagDanDī ko

ḳhālī ḳhālī āñkhoñ se

yūñhī dekhtā rahtā hai

aur pagDanDī is gahrī chup se

tañg sī aa kar

ulTe qadmoñ jañg meñ se phirtī phirātī

vāpas shahr ko jaatī hai

aur koltār kī saḌkoñ meñ kho jaatī hai

ye pagDanDi

chalte chalte jangal mein se phirti phiraati dur hain

ghane ghane peDon mein chhupe

ek mandir tak le jati hai

bahut purani kai-zada si siDhi chaDh kar

mandir mein jab daKHil hun to

farsh ke upar bikhre hue

kuchh pile patte milte hain

ya kahin kahin pe jalti jalti aankhon wale sanp dikhai dete hain

diwaron par naqsh purane maddham maddham

bahut purane qisse le kar jag rahe hain

jin se kuchh anjaani si KHushbuen lipTi

hanp rahi hain

beach mein ek asthan ke upar

pyari si ek murat hai

jo janm janm se sochon ke patal mein Dubi

jag rahi hai

kabhi kabhi ek chhan-chhan chhan-chhan

hawa mein tairti jati hai

aur haule haule siski ban kar

bikhar bikhar si jati hai

phir gahri chup mein kone se

chamgadaD koi uDti hai

to chup ki chiKHen

mandir ki har murat ko dahlati hain

jaane kab se aisa hota aaya hai

ye gunga mandir pagDanDi ko

KHali KHali aankhon se

yunhi dekhta rahta hai

aur pagDanDi is gahri chup se

tang si aa kar

ulTe qadmon jang mein se phirti phiraati

wapas shahr ko jati hai

aur koltar ki saDkon mein kho jati hai