sahar hone tak

larazte sāyoñ se mub.ham nuqūsh ubharte haiñ

ik an-kahī sī kahānī, ik an-sunī sī baat

tavīl raat kī ḳhāmoshiyoñ meñ Dhaltī hai

fasurda lamhe ḳhalāoñ meñ rañg bharte haiñ

sadā.eñ zehn kī pinhā.iyoñ meñ gūñjtī haiñ

ḳhizāñ ke saa.e jhalakte haiñ terī āñkhoñ meñ

tirī nigāhoñ meñ rafta bahāroñ kā ġham hai''

hayāt ḳhvāb-gahoñ meñ panāh DhūñDtī hai

fasurda lamhe ḳhalāoñ meñ rañg bharte haiñ

ye gardish-e-mah-o-sāl aazmā chukī hai jinheñ

ye gardish-e-mah-o-sāl aazmā rahī hai hameñ

magar ye soch ki anjām-e-kār kyā hogā

davām terā muqaddar hai aur na merā nasīb

davām kis ko milā hai jo ham ko mil jātā?

ye chand lamha agar jāvedāñ na ho jaate

maiñ sochtā huuñ ki apnā nishān kyā hotā

kahāñ pe TūTtā jabr-e-hayāt kā afsūñ

kahāñ pahuñch ke ḳhayāloñ ko aasrā miltā?

fasurda lamho, abhī aur be-karāñ ho jaao

fasurda lamho, aur be-karāñ ho jaao

larazte sayon se mubham nuqush ubharte hain

ek an-kahi si kahani, ek an-suni si baat

tawil raat ki KHamoshiyon mein Dhalti hai

fasurda lamhe KHalaon mein rang bharte hain

sadaen zehn ki pinhaiyon mein gunjti hain

KHizan ke sae jhalakte hain teri aankhon mein

teri nigahon mein rafta bahaaron ka gham hai

hayat KHwab-gahon mein panah DhunDti hai

fasurda lamhe KHalaon mein rang bharte hain

ye gardish-e-mah-o-sal aazma chuki hai jinhen

ye gardish-e-mah-o-sal aazma rahi hai hamein

magar ye soch ki anjam-e-kar kya hoga

dawam tera muqaddar hai aur na mera nasib

dawam kis ko mila hai jo hum ko mil jata?

ye chand lamha agar jawedan na ho jate

main sochta hun ki apna nishan kya hota

kahan pe TuTta jabr-e-hayat ka afsun

kahan pahunch ke KHayalon ko aasra milta?

fasurda lamho, abhi aur be-karan ho jao

fasurda lamho, aur be-karan ho jao