saheli bujh paheli

parcham sar-e-maidān-e-viġhā khol rahā hai

mansūr ke parde meñ ḳhudā bol rahā hai

kyā sail-e-baġhāvat hai murīdoñ kī safoñ meñ

pīrān-e-tahī-dast kā dil Dol rahā hai

ai vaa.e sabā aqrab-e-jarrāra chaman meñ

sarsar ke ishārāt pe bis ghol rahā hai

afrang ke derīna ġhulāmoñ kī razā par

ḳhud pīr-e-haram band-e-qabā khol rahā hai

kuchh baat hī aisī hai ki paimāna-e-zar meñ

ik rind-e-tunuk-zarf lahū tol rahā hai

buz-ġhāla-e-afrang shaġhāloñ ke jilau meñ

kis ThāTh se zarġhām-sifat bol rahā hai

tārīḳh ke vīrāna-e-ābād meñ 'shorish'

kuchh qīmtī motī haiñ qalam rol rahā hai

parcham sar-e-maidan-e-wigha khol raha hai

mansur ke parde mein KHuda bol raha hai

kya sail-e-baghawat hai muridon ki safon mein

piran-e-tahi-dast ka dil Dol raha hai

ai wae saba aqrab-e-jarrara chaman mein

sarsar ke ishaaraat pe bis ghol raha hai

afrang ke derina ghulamon ki raza par

KHud pir-e-haram band-e-qaba khol raha hai

kuchh baat hi aisi hai ki paimana-e-zar mein

ek rind-e-tunuk-zarf lahu tol raha hai

buz-ghaala-e-afrang shaghaalon ke jilau mein

kis ThaTh se zargham-sifat bol raha hai

tariKH ke virana-e-abaad mein 'shorish'

kuchh qimti moti hain qalam rol raha hai