saheli

havā kī surma.ī rath par

madhur, dhīme suroñ meñ boltī bārish

mire vijdān kā pahlā jazīra hai

vo akasr raat ke pichhle pahar koī purānā giit gaatī hai

mire tan kī pyāsī ret meñ ḳhushbū milātī hai

kabhī apnī mahaktī narm poroñ se mirā shāna hilātī hai

mirī nazmoñ ke misroñ meñ tarannum chhoḌ jaatī hai

vo gūñge des kī vīrān galiyoñ meñ

''sar-e-bāzār mī-raqsam'' kā ilhāmī vazīfa gungunātī hai

baqā-e-yār kī ḳhātir fanā taslīm kartī hai...

fazā meñ koñpleñ taqsīm kartī hai!

diloñ ke āstānoñ par dhamāleñ Dāltī...

mirī pahlī sahelī hai...

hawa ki surmai rath par

madhur, dhime suron mein bolti barish

mere wijdan ka pahla jazira hai

wo akasr raat ke pichhle pahar koi purana git gati hai

mere tan ki pyasi ret mein KHushbu milati hai

kabhi apni mahakti narm poron se mera shana hilati hai

meri nazmon ke misron mein tarannum chhoD jati hai

wo gunge des ki viran galiyon mein

sar-e-bazar mi-raqsam ka ilhami wazifa gungunati hai

baqa-e-yar ki KHatir fana taslim karti hai

faza mein konplen taqsim karti hai!

dilon ke aastanon par dhamalen Dalti

meri pahli saheli hai