sail-e-ab

raat merī aañkh jab khulī

to khaaT merī hil rahī thī

hil rahī thī naav

sail-e-āb ke maqām-e-asl par

sitāre jhaḌ rahe the āsmān se

ḳhalā ba-zāt-e-ḳhud siyāh haul thā banā huā

pahāḌ se nikal rahī thī

tez dhaar kī tarah havā

ubal rahā thā

jaise sail-e-āb ke maqām se

añdherā āb-e-sard ko lapeTtā

nigal rahā thā raushnī kī zard sī lakīr ko

ulaT rahī thī kā.enāt ik taraf

kisī kā dast-e-nāznīñ

mirī jabīn par rukā

shafaq se surḳh hoñT

mere ḳhushk hoñToñ se mile

maiñ jī uThā

maiñ muskurā ke jaag uThā

ufuq ke dasht meñ

tilism-e-ahmarīñ chahār samt thā usī tarah

ma'an safed din nikal paḌā

nizām-e-kā.enāt phir se chal paḌā

raat meri aankh jab khuli

to khaT meri hil rahi thi

hil rahi thi naw

sail-e-ab ke maqam-e-asl par

sitare jhaD rahe the aasman se

KHala ba-zat-e-KHud siyah haul tha bana hua

pahaD se nikal rahi thi

tez dhaar ki tarah hawa

ubal raha tha

jaise sail-e-ab ke maqam se

andhera aab-e-sard ko lapeTta

nigal raha tha raushni ki zard si lakir ko

ulaT rahi thi kaenat ek taraf

kisi ka dast-e-naznin

meri jabin par ruka

shafaq se surKH honT

mere KHushk honTon se mile

main ji uTha

main muskura ke jag uTha

ufuq ke dasht mein

tilism-e-ahmarin chahaar samt tha usi tarah

ma'an safed din nikal paDa

nizam-e-kaenat phir se chal paDa