sajae gae elanat

aaj añdherā ījād mat kījiye

ki maiñ apnā āḳhirī charāġh bhī

mohabbat ke jurm meñ qatl hone

vāloñ kī qabr par jalā aayā huuñ

ek qabr khodiye

mere paas ek nazm hai

jis meñ merī maut kā

zikr hai

us nazm ko qabr meñ gaaḌ dījiye

shajar-kārī muhim ke daurān

ek-ādh daraḳht merī

āñkhoñ meñ lagā.iye

ki maiñ aksar ḳhvāb meñ

lambe safar par nikaltā huuñ

aur mere rāste par

koī daraḳht nahīñ hotā

merī siiv darāz meñ rakh lījiye

ki merī siiv par kisī mohabbat yā

kisī ḳhvāb kā zikr nahīñ hai

ḳhizāñ ko kuchh der aur roke rakhiye

ki maiñ ne kuchh phuul ek aise

shaḳhs ko dene haiñ

jise kuchh din zinda rahne kī mohlat milī

aaj dūsre din kī shaam hai

mere paas ek zer-e-ta.amīr muskurāhaT hai

merī ek tasvīr khīñche

aur gum-shuda afrād kī tasvīroñ

ke saath rakh dījiye

ki DhūñDne vāloñ ko ye to

mālūm ho ki kyoñ maiñ apnī muskurāhaT

mukammal ta.amīr nahīñ kar sakā

aaj andhera ijad mat kijiye

ki main apna aaKHiri charagh bhi

mohabbat ke jurm mein qatl hone

walon ki qabr par jala aaya hun

ek qabr khodiye

mere pas ek nazm hai

jis mein meri maut ka

zikr hai

us nazm ko qabr mein gaD dijiye

shajar-kari muhim ke dauran

ek-adh daraKHt meri

aankhon mein lagaiye

ki main aksar KHwab mein

lambe safar par nikalta hun

aur mere raste par

koi daraKHt nahin hota

meri siw daraaz mein rakh lijiye

ki meri siw par kisi mohabbat ya

kisi KHwab ka zikr nahin hai

KHizan ko kuchh der aur roke rakhiye

ki main ne kuchh phul ek aise

shaKHs ko dene hain

jise kuchh din zinda rahne ki mohlat mili

aaj dusre din ki sham hai

mere pas ek zer-e-tamir muskurahaT hai

meri ek taswir khinche

aur gum-shuda afrad ki taswiron

ke sath rakh dijiye

ki DhunDne walon ko ye to

malum ho ki kyon main apni muskurahaT

mukammal tamir nahin kar saka