sajjad-zahir ke nam

na ab ham saath sair-e-gul kareñge

na ab mil kar sar-e-maqtal chaleñge

hadīs-e-dil-barāñ bāham kareñge

na ḳhūn-e-dil se sharh-e-ġham kareñge

na lailā-e-suḳhan kī dost-dārī

na ġham-hā-e-vatan par ashk-bārī

suneñge naġhma-e-zanjīr mil kar

na shab bhar mil ke chhalkāeñge sāġhar

ba-nām-e-shāhid-e-nāzuk-ḳhayālāñ

ba-yād-e-mastī-e-chashm-e-ġhazālāñ

ba-nām-e-imbisāt-e-bazm-e-rindāñ

ba-yād-e-kulfat-e-ayyām-e-zindāñ

sabā aur us kā andāz-e-takallum

sahar aur us kā āġhāz-e-tabassum

fazā meñ ek haala sā jahāñ hai

yahī to masnad-e-pīr-e-muġhāñ hai

sahar-gah ab usī ke naam saaqī

kareñ itmām-e-daur jaam saaqī

bisāt-e-bāda-o-mīnā uThā lo

baḌhā do sham-e-mahfil bazm vaalo

piyo ab ek jām-e-al-vidā.ī

piyo aur pī ke sāġhar toḌ Daalo

na ab hum sath sair-e-gul karenge

na ab mil kar sar-e-maqtal chalenge

hadis-e-dil-baran baham karenge

na KHun-e-dil se sharh-e-gham karenge

na laila-e-suKHan ki dost-dari

na gham-ha-e-watan par ashk-bari

sunenge naghma-e-zanjir mil kar

na shab bhar mil ke chhalkaenge saghar

ba-nam-e-shahid-e-nazuk-KHayalan

ba-yaad-e-masti-e-chashm-e-ghazalan

ba-nam-e-imbisat-e-bazm-e-rindan

ba-yaad-e-kulfat-e-ayyam-e-zindan

saba aur us ka andaz-e-takallum

sahar aur us ka aaghaz-e-tabassum

faza mein ek haala sa jahan hai

yahi to masnad-e-pir-e-mughan hai

sahar-gah ab usi ke nam saqi

karen itmam-e-daur jam saqi

bisat-e-baada-o-mina uTha lo

baDha do sham-e-mahfil bazm walo

piyo ab ek jam-e-al-widai

piyo aur pi ke saghar toD Dalo