samundar

hai samundar diid meñ terī fusūñ-kārī bahut

dekhne vāloñ kī kartā hai to dildārī bahut

har udāsī meñ tirī maujoñ kā dekhā hai fusūñ

muztarib zehnoñ ko detī haiñ tirī lahreñ sukūñ

kyā batā.ūñ terī maujoñ kī ravānī kā amal

gulsitān-e-shaiḳh-'sa.dī' hai ki ruumī kī ġhazal

nīm-shab mahtāb kī kirnoñ kā vo aks-e-jamīl

tah-ba-tah pighlī huī chāñdī hai rashk-e-salsabīl

tujh meñ aa kar mil gayā āb-e-ravān-e-mushkbū

jo rahā mahv-e-safar dariyā-ba-dariyā jū-ba-jū

god se terī jo paanī uTh ke bādal ban gayā

kisht par bārish to barg-o-gul pe shabnam ban gayā

fitrat-e-insān kā akkās hai terā junūñ

gah talātum maujzan lahroñ meñ gah rashk-e-sukūñ

nīlgūñ goshe se phir ḳhāvar su'ūd-āmāda hai

shoḳhī-e-fitrat kī akkāsī kā tū dil-dāda hai

mehr kī tābāniyāñ jab ġhusl detī haiñ tujhe

Dhāñp lete haiñ hayā se ghor bādal ke pare

tere siine par ye lahreñ maujzan haiñ kis liye

sang-e-sāhil par yūñhī tāqat-shikan haiñ kis liye

baḌh rahī hai mauj jo sāhil se Takrā jā.egī

tez-ro insānoñ ko shāyad ye samjhā jā.egī

josh meñ baḌhte haiñ jo aql-o-ḳhirad se be-niyāz

kar nahīñ paate vo apnī quvvatoñ kā irtikāz

nau-e-insāñ kī ḳhushī marhūn-e-minnat hai tirī

dūsroñ par ho atā goyā ye jannat hai tirī

chīrte rahte haiñ siine ko tire jangī jahāz

hazrat-e-insāñ kī sannā.ī hai kaisī kārsāz

zindagī paanī se hai aur aab kā mamba.a hai tū

dī buzurgī tujh ko ḳhāliq ne bahut arfa.a hai tū

ḳhushk aur pyāsī zamīñ terī atā se shaad hai

jis jagah terā amal hai vo jagah ābād hai

tū baḌā to hai takabbur se magar mahfūz hai

azmat-e-mālik tujhe har-ān yuuñ malhūz hai

terī maujeñ uTh ke jhukne meñ bahut hī tez haiñ

bārgāh-e-hazrat-e-ḳhāliq meñ sajda-rez haiñ

hai samundar did mein teri fusun-kari bahut

dekhne walon ki karta hai to dildari bahut

har udasi mein teri maujon ka dekha hai fusun

muztarib zehnon ko deti hain teri lahren sukun

kya bataun teri maujon ki rawani ka amal

gulsitan-e-shaiKH-'sadi' hai ki rumi ki ghazal

nim-shab mahtab ki kirnon ka wo aks-e-jamil

tah-ba-tah pighli hui chandi hai rashk-e-salsabil

tujh mein aa kar mil gaya aab-e-rawan-e-mushkbu

jo raha mahw-e-safar dariya-ba-dariya ju-ba-ju

god se teri jo pani uTh ke baadal ban gaya

kisht par barish to barg-o-gul pe shabnam ban gaya

fitrat-e-insan ka akkas hai tera junun

gah talatum maujzan lahron mein gah rashk-e-sukun

nilgun goshe se phir KHawar su'ud-amada hai

shoKHi-e-fitrat ki akkasi ka tu dil-dada hai

mehr ki tabaniyan jab ghusl deti hain tujhe

Dhanp lete hain haya se ghor baadal ke pare

tere sine par ye lahren maujzan hain kis liye

sang-e-sahil par yunhi taqat-shikan hain kis liye

baDh rahi hai mauj jo sahil se Takra jaegi

tez-ro insanon ko shayad ye samjha jaegi

josh mein baDhte hain jo aql-o-KHirad se be-niyaz

kar nahin pate wo apni quwwaton ka irtikaz

nau-e-insan ki KHushi marhun-e-minnat hai teri

dusron par ho ata goya ye jannat hai teri

chirte rahte hain sine ko tere jangi jahaz

hazrat-e-insan ki sannai hai kaisi karsaz

zindagi pani se hai aur aab ka mamba hai tu

di buzurgi tujh ko KHaliq ne bahut arfa hai tu

KHushk aur pyasi zamin teri ata se shad hai

jis jagah tera amal hai wo jagah aabaad hai

tu baDa to hai takabbur se magar mahfuz hai

azmat-e-malik tujhe har-an yun malhuz hai

teri maujen uTh ke jhukne mein bahut hi tez hain

bargah-e-hazrat-e-KHaliq mein sajda-rez hain