samundar ki jaanib se aati hawa mein

kabhī nīlgūñ āsmāñ ke tale

sabz sāhil pe milne kā va.ada huā thā

samundar kisī ḳhvāb sā ḳhushnumā thā

samundar ke pahlū meñ

shahr-e-dil-afroz kā hamhama thā

ye shahr aaj ashkoñ meñ Duubā huā hai

yahāñ se vahāñ tak

har ik rahguzar par

ik aaseb kā sāmnā hai

nigāhoñ ke aage dhuāñ hai

samundar kahāñ hai

samundar ke sāhil pe milne kā va.ada huā thā

koī aaj bhī us bulāve kī ummīd meñ

ḳhud se rūThā huā hai

koī be-qarārī ke sāhil pe

āñkheñ bichhā.e khaḌā hai

koī rañj oḌhe hue so rahā hai

koī ḳhauf taane hue jāgtā hai

koī be-karāñ pyaas meñ Dūbtā hai

koī aas ke pāniyoñ ko

abas jhāgtā hai

ajab us zamīñ kī fazā hai

ajab aaj rañg-e-falak hai

samundar kī jānib se aatī havā meñ

lahū kī mahak hai

kabhi nilgun aasman ke tale

sabz sahil pe milne ka wada hua tha

samundar kisi KHwab sa KHushnuma tha

samundar ke pahlu mein

shahr-e-dil-afroz ka hamhama tha

ye shahr aaj ashkon mein Duba hua hai

yahan se wahan tak

har ek rahguzar par

ek aaseb ka samna hai

nigahon ke aage dhuan hai

samundar kahan hai

samundar ke sahil pe milne ka wada hua tha

koi aaj bhi us bulawe ki ummid mein

KHud se ruTha hua hai

koi be-qarari ke sahil pe

aankhen bichhae khaDa hai

koi ranj oDhe hue so raha hai

koi KHauf tane hue jagta hai

koi be-karan pyas mein Dubta hai

koi aas ke paniyon ko

abas jhagta hai

ajab us zamin ki faza hai

ajab aaj rang-e-falak hai

samundar ki jaanib se aati hawa mein

lahu ki mahak hai