sannaTa chiKH uThta hai

havā laal īñToñ kī galiyoñ se guzartī

sīlan-zada koThariyoñ meñ bachche jantī hai

ghuTī ghuTī sāñseñ letī huī

jab bāhar nikaltī hai

to ThanD se kubḌī ho chukī hotī hai

sīdhā chalne kī ḳhvāhish meñ

ūñche nīche rastoñ par

ghoḌoñ ke sumoñ tale

kīchaḌ meñ lat-pat sar paTaḳhtī

uThne kī koshish kartī hai

aur reñgte reñgte kisī havelī meñ jā ghustī hai

jahāñ raat kā sannāTā bain kar rahā hotā hai

qadmoñ kī mānūs sī chāpoñ se

havelī ke sannāToñ meñ

guuñj kī darāḌeñ paḌne lagtī haiñ

havā kise DhūñDhtī hai

vo jāntī hai ki pasāroñ meñ ajdād ke fan kā lohā

sandūqoñ meñ bharā paḌā hai

purkhoñ ke afkār

shelfoñ par qarīne se saje haiñ

ek baḌe kamre meñ gol mez par

kroshiye se kāḌhe hue rūmāl meñ

us ne apnī āñkheñ bhī kaaḌh dī haiñ

vo rotī huī

rūmāl meñ kāḌhī huī āñkhoñ ko chūmtī hai

aur havelī ke dar-o-dīvār se lipTī huī

āḳhirī nishānī talāsh kar rahī hotī hai

ki sannāTā chīḳh uThtā hai

hawa lal inTon ki galiyon se guzarti

silan-zada koThariyon mein bachche janti hai

ghuTi ghuTi sansen leti hui

jab bahar nikalti hai

to ThanD se kubDi ho chuki hoti hai

sidha chalne ki KHwahish mein

unche niche raston par

ghoDon ke sumon tale

kichaD mein lat-pat sar paTaKHti

uThne ki koshish karti hai

aur rengte rengte kisi haweli mein ja ghusti hai

jahan raat ka sannaTa bain kar raha hota hai

qadmon ki manus si chapon se

haweli ke sannaTon mein

gunj ki daraDen paDne lagti hain

hawa kise DhunDhti hai

wo jaanti hai ki pasaron mein ajdad ke fan ka loha

sanduqon mein bhara paDa hai

purkhon ke afkar

shelfon par qarine se saje hain

ek baDe kamre mein gol mez par

kroshiye se kaDhe hue rumal mein

us ne apni aankhen bhi kaDh di hain

wo roti hui

rumal mein kaDhi hui aankhon ko chumti hai

aur haweli ke dar-o-diwar se lipTi hui

aaKHiri nishani talash kar rahi hoti hai

ki sannaTa chiKH uThta hai