sar-e-mizhgan

raat ik ḳhvāb ne āñkheñ mire andar kholīñ

aur bistar kī shikan khīñch ke sīdhī kar dī

phir sirhāne se ikaTThe kiye guzre lamhe

ek tasvīr banā kar sar-e-mizhgāñ rakh dī

aañkh kholūñgī to ye bojh giregā aise

aañkh kā gumbad-e-sīmāb pighal jā.egā

mere sab ḳhvāboñ ḳhayāloñ ko nigal jā.egā

aur agar aañkh na kholī to ye girya karte

sar paTakte hue lamhe kisī dīmak kī tarah

aañkh ke band ġhilāfoñ se chipak jā.eñge

is imārat kā har ik naqsh miTā Dāleñge

ab jo karte haiñ ye bistar kā tavāf āhista

mere hone ke bahāne se zarā pahle hī

is darīche meñ ubhar aa.e sahar kī aahaT

sātveñ phere ke aane se zarā pahle hī

raat ek KHwab ne aankhen mere andar kholin

aur bistar ki shikan khinch ke sidhi kar di

phir sirhane se ikaTThe kiye guzre lamhe

ek taswir bana kar sar-e-mizhgan rakh di

aankh kholungi to ye bojh girega aise

aankh ka gumbad-e-simab pighal jaega

mere sab KHwabon KHayalon ko nigal jaega

aur agar aankh na kholi to ye girya karte

sar paTakte hue lamhe kisi dimak ki tarah

aankh ke band ghilafon se chipak jaenge

is imarat ka har ek naqsh miTa Dalenge

ab jo karte hain ye bistar ka tawaf aahista

mere hone ke bahane se zara pahle hi

is dariche mein ubhar aae sahar ki aahaT

satwen phere ke aane se zara pahle hi