sar-e-rahe

guzar rahā thā lakhna.ū kī ek shāhrāh se

nazar ulajh ke rah ga.ī nigāh-e-mehr-o-māh se

gulāb ke libās meñ parī utar ke aa ga.ī

hayāt ban ke aa.ī thī hayāt ban ke chhā ga.ī

fazā meñ irti.āsh thā diloñ ke is gudāz se

ki jaise pī rahā thā maiñ nigāh-e-nīm-bāz se

un ahmarīñ laboñ pe ek raqs-e-nā-tamām thā

sukūt sā sukūt thā kalām sā kalām thā

maiñ us kī is adā se ḳhud hijāb khā ke rah gayā

vo muskurā ke rah ga.ī maiñ sar jhukā ke rah gayā

baḌhī vo saa.e kī tarah ravāñ-davāñ ravāñ-davāñ

maiñ us ke pīchhe ho liyā misāl-e-gard-e-kārvāñ

maiñ chāhtā thā hāl-e-dil sunā ke us ko chuum luuñ

pakaḌ ke donoñ hāthoñ ko fazā meñ jhuum jhuum luuñ

zabān-e-dil se phir kahūñ tumhīñ mirī bahār ho

sukūn-e-qalb-e-zār ho surūr-e-sad-ḳhumār ho

diloñ kī dhaḌkanoñ meñ ik ajiib iztirāb thā

qadam bahak rahe the aur sāmne shabāb thā

maiñ us se ye na kah sakā ki tum mirī hayāt ho

tilism hī faqat nahīñ tamām kā.enāt ho

hasīn-o-mah-jabīñ vo ek gul ke paas ruk ga.ī

nazar milā ke hañs paḌī guloñ kī shāḳh jhuk ga.ī

ba-sad-adā chalī ga.ī hasīñ mahal meñ vo parī

maiñ dil pakaḌ ke rah gayā ba-īñ ḳhayāl-e-dilbarī

guzar raha tha lakhnau ki ek shahrah se

nazar ulajh ke rah gai nigah-e-mehr-o-mah se

gulab ke libas mein pari utar ke aa gai

hayat ban ke aai thi hayat ban ke chha gai

faza mein irtiash tha dilon ke is gudaz se

ki jaise pi raha tha main nigah-e-nim-baz se

un ahmarin labon pe ek raqs-e-na-tamam tha

sukut sa sukut tha kalam sa kalam tha

main us ki is ada se KHud hijab kha ke rah gaya

wo muskura ke rah gai main sar jhuka ke rah gaya

baDhi wo sae ki tarah rawan-dawan rawan-dawan

main us ke pichhe ho liya misal-e-gard-e-karwan

main chahta tha haal-e-dil suna ke us ko chum lun

pakaD ke donon hathon ko faza mein jhum jhum lun

zaban-e-dil se phir kahun tumhin meri bahaar ho

sukun-e-qalb-e-zar ho surur-e-sad-KHumar ho

dilon ki dhaDkanon mein ek ajib iztirab tha

qadam bahak rahe the aur samne shabab tha

main us se ye na kah saka ki tum meri hayat ho

tilism hi faqat nahin tamam kaenat ho

hasin-o-mah-jabin wo ek gul ke pas ruk gai

nazar mila ke hans paDi gulon ki shaKH jhuk gai

ba-sad-ada chali gai hasin mahal mein wo pari

main dil pakaD ke rah gaya ba-in KHayal-e-dilbari