sarab se sarab tak

vo qurbateñ

vo rāhateñ

vo dil-navāz sohbateñ

vo dilrubā sadāqateñ

vo ek lamha-e-tarab meñ

kā.enāt-e-rang-o-bū kī vus.ateñ

kahāñ haiñ ab

kahīñ haiñ sab

palak jhapakte hī vo kaise

ik sarāb kī tarah se

reg-zār-e-tishna-lab meñ dhañs ga.iiñ

habāb kī tarah vo kyoñ

havā kī ek choT se hī

TuuT kar bikhar ga.iiñ

ye dūriyāñ

ye fāsle

ye sust-gām fāsle

azaab se azaab tak

ye tishna-kām fāsle

sarāb se sarāb tak

jarāhatoñ ke dasht meñ

ye ḳhūñ-chakāñ fazā-e-dil

ye aable

ye ḳhāmushī

ye vasvasoñ kī gard se aTī

muhīb ḳhāmushī

jo Das rahī hai dam-ba-dam

har ek manzar-e-ḳhayāl ko

ye kis tarah ke ham-safar haiñ

kaise ye rafīq haiñ

magar ye mujh se kis qadar qarīb haiñ

ki ab tumhārī chāhatoñ ke

bas yahī halīf haiñ

wo qurbaten

wo rahaten

wo dil-nawaz sohbaten

wo dilruba sadaqaten

wo ek lamha-e-tarab mein

kaenat-e-rang-o-bu ki wusaten

kahan hain ab

kahin hain sab

palak jhapakte hi wo kaise

ek sarab ki tarah se

reg-zar-e-tishna-lab mein dhans gain

habab ki tarah wo kyon

hawa ki ek choT se hi

TuT kar bikhar gain

ye duriyan

ye fasle

ye sust-gam fasle

azab se azab tak

ye tishna-kaam fasle

sarab se sarab tak

jarahaton ke dasht mein

ye KHun-chakan faza-e-dil

ye aable

ye KHamushi

ye waswason ki gard se aTi

muhib KHamushi

jo Das rahi hai dam-ba-dam

har ek manzar-e-KHayal ko

ye kis tarah ke ham-safar hain

kaise ye rafiq hain

magar ye mujh se kis qadar qarib hain

ki ab tumhaari chahaton ke

bas yahi halif hain