sarqa-o-tawarud

ek ālim-e-dīñ ne kisī shā.ir se kahā ye

andāz-e-takallum se ayaañ hai tire sarqa

ash.ār meñ auroñ ke tū kartā hai tasarruf

ye terā taḳhayyul hai ki 'ġhālib' kā hai charba

ye shoḳhī-o-jiddat tirī qudrat se hai bāhar

ye shai to haqīqat meñ buzurgoñ kā hai virsa

shā.ir ne adab se ye kahā ālim-e-dīñ se

taqlīd to hai fitrat-e-insāñ kā taqāzā

taqlīd se āzād nahīñ aap kā bhī zehn

is par bhī 'hanīfa'-o-'ġhazālī' kā hai ġhalba

taqrīr-o-mazāmīñ pe akābir ulmā ke

hazrat ko bhī kyā ḳhuub tasarruf kā hai malka

aap aur sharī.at ke ye pur-pech masā.il

kyā 'rūmī'-o-'rāzī' kā nahīñ ye bhī atiyya

qudrat ho tasarruf pe to jaa.ez hai tasarruf

nāyāb hai aqvāl-e-salaf kā ye ḳhazīna

insān ke a.amāl to niyyat pe haiñ mauqūf

niyyat ho agar saaf to shar kā nahīñ shub.ha

āgāh nahīñ aap tavārud ke amal se

afsos hai kahte haiñ tavārud ko bhī sarqa

jaa.ez ise rakkhā hai har ik ahl-e-nazar ne

Dhal jaa.e na.e jaam meñ gar bāda-e-kohna

tanqīd kareñ aap zarā soch samajh kar

ulTā na paḌe aap kī gardan pe ye harba

tanqīd kā fan is qadar āsān nahīñ hai

shohrat kā ise aap banā.eñ na zarīya

ek aalim-e-din ne kisi shair se kaha ye

andaz-e-takallum se ayan hai tere sarqa

ashaar mein auron ke tu karta hai tasarruf

ye tera taKHayyul hai ki 'ghaalib' ka hai charba

ye shoKHi-o-jiddat teri qudrat se hai bahar

ye shai to haqiqat mein buzurgon ka hai wirsa

shair ne adab se ye kaha aalim-e-din se

taqlid to hai fitrat-e-insan ka taqaza

taqlid se aazad nahin aap ka bhi zehn

is par bhi 'hanifa'-o-'ghazali' ka hai ghalba

taqrir-o-mazamin pe akabir ulma ke

hazrat ko bhi kya KHub tasarruf ka hai malka

aap aur shariat ke ye pur-pech masail

kya 'rumi'-o-'raazi' ka nahin ye bhi atiyya

qudrat ho tasarruf pe to jaez hai tasarruf

nayab hai aqwal-e-salaf ka ye KHazina

insan ke aamal to niyyat pe hain mauquf

niyyat ho agar saf to shar ka nahin shubha

aagah nahin aap tawarud ke amal se

afsos hai kahte hain tawarud ko bhi sarqa

jaez ise rakkha hai har ek ahl-e-nazar ne

Dhal jae nae jam mein gar baada-e-kohna

tanqid karen aap zara soch samajh kar

ulTa na paDe aap ki gardan pe ye harba

tanqid ka fan is qadar aasan nahin hai

shohrat ka ise aap banaen na zariya