sawal

ye saarī duniyā savāliya hai

har ek chehra savāl andar savāl hai aur

har ek manzar savāl ban kar

javāb kā muntazir khaḌā hai

agar koī sāmne bhī aa.e

aur aa ke ik baat kā bhī ham ko

javāb de de

to dar-haqīqat javāb meñ bhī

na jaane kitne savāl hoñge

hazār-hā nit-na.e masā.il hameñ mileñge

ki aaj tak to yahī huā hai

javāb hī se savāl nikle

javāb hī meñ savāl DhūñDe

ye saarī duniyā savāliya hai

ḳhud aadmī ik savāl hai aur

usī ne paiham savāl uThā ke

savāl karne kī riit Daalī

savāl-e-avval bhī aadmī hai

savāl-e-āḳhir bhī aadmī hai

javāb-e-mutlaq bhī aadmī hai

agar yaqīñ ho

to aadmī par kamand Dāleñ

savāl hī meñ javāb DhūñDeñ

ye sari duniya sawaliya hai

har ek chehra sawal andar sawal hai aur

har ek manzar sawal ban kar

jawab ka muntazir khaDa hai

agar koi samne bhi aae

aur aa ke ek baat ka bhi hum ko

jawab de de

to dar-haqiqat jawab mein bhi

na jaane kitne sawal honge

hazar-ha nit-nae masail hamein milenge

ki aaj tak to yahi hua hai

jawab hi se sawal nikle

jawab hi mein sawal DhunDe

ye sari duniya sawaliya hai

KHud aadmi ek sawal hai aur

usi ne paiham sawal uTha ke

sawal karne ki rit Dali

sawal-e-awwal bhi aadmi hai

sawal-e-aKHir bhi aadmi hai

jawab-e-mutlaq bhi aadmi hai

agar yaqin ho

to aadmi par kamand Dalen

sawal hi mein jawab DhunDen