shaer ka KHwab

mere pote ne oxigen kā basta

apnī piiTh par bāñdh kar

ijāzat māñgī

ḳhalā ke safar ke liye

mere beTe ne jo raushnī ko gin

rahā thā mez par

apnī nigāhoñ ke do savāliya

shānoñ ko

uchhāl diyā merī taraf

maiñ ne davā kī goliyoñ ke rakhte hue

ek marīza ke nahīf haath meñ

apnī jhurriyoñ ke bhañvar se

pheñk dayā do nigāhoñ kā savāl

pusht kī dīvār par

jahāñ ek shā.erī kī tasvīr hai

Tañgī huī

vo mere baabā haiñ

ki ḳhvāb kī duniyā basāne vaale

shā.er ke

ḳhvāboñ kī ye tīsrī ta.abīr thī

ek pal ḳhāmushī rahī

ek pal ke ba.ad

hoñToñ ke chand phuul khile

jabīñ par ik chāñd ugā aur

phir ġhurūb ho gayā

aur

duur ḳhalāoñ meñ upar ko tairtī huī

machine kī āvāz

maddham hotī chalī ga.ī

mere pote ne oxigen ka basta

apni piTh par bandh kar

ijazat mangi

KHala ke safar ke liye

mere beTe ne jo raushni ko gin

raha tha mez par

apni nigahon ke do sawaliya

shanon ko

uchhaal diya meri taraf

main ne dawa ki goliyon ke rakhte hue

ek mariza ke nahif hath mein

apni jhurriyon ke bhanwar se

phenk daya do nigahon ka sawal

pusht ki diwar par

jahan ek shaeri ki taswir hai

Tangi hui

wo mere baba hain

ki KHwab ki duniya basane wale

shaer ke

KHwabon ki ye tisri tabir thi

ek pal KHamushi rahi

ek pal ke baad

honTon ke chand phul khile

jabin par ek chand uga aur

phir ghurub ho gaya

aur

dur KHalaon mein upar ko tairti hui

machine ki aawaz

maddham hoti chali gai