shaer log

har ik daur meñ har zamāne meñ ham

zahr piite rahe, giit gaate rahe

jaan dete rahe zindagī ke liye

sā.at-e-vasl kī sarḳhushī ke liye

diin o duniyā kī daulat luTāte rahe

faqr-o-fāqa kā tosha sambhāle hue

jo bhī rasta chunā us pe chalte rahe

maal vaale haqārat se takte rahe

ta.an karte rahe haath malte rahe

ham ne un par kiyā harf-e-haq sañg-zan

jin kī haibat se duniyā laraztī rahī

jin pe aañsū bahāne ko koī na thā

apnī aañkh un ke ġham meñ barastī rahī

sab se ojhal hue hukm-e-hākim pe ham

qaid-ḳhāne sahe, tāziyāne sahe

log sunte rahe sāz-e-dil kī sadā

apne naġhme salāḳhoñ se chhante rahe

ḳhūñ-chakāñ dahr kā ḳhūñ-chakāñ ā.īna

dukh-bharī ḳhalq kā dukh-bharā dil haiñ ham

tab.a-e-shā.er hai jañgāh-e-adl-o-sitam

munsif-e-ḳhair-o-shar haqq-o-bātil haiñ ham

har ek daur mein har zamane mein hum

zahr pite rahe, git gate rahe

jaan dete rahe zindagi ke liye

saat-e-wasl ki sarKHushi ke liye

din o duniya ki daulat luTate rahe

faqr-o-faqa ka tosha sambhaale hue

jo bhi rasta chuna us pe chalte rahe

mal wale haqarat se takte rahe

tan karte rahe hath malte rahe

hum ne un par kiya harf-e-haq sang-zan

jin ki haibat se duniya larazti rahi

jin pe aansu bahane ko koi na tha

apni aankh un ke gham mein barasti rahi

sab se ojhal hue hukm-e-hakim pe hum

qaid-KHane sahe, taziyane sahe

log sunte rahe saz-e-dil ki sada

apne naghme salaKHon se chhante rahe

KHun-chakan dahr ka KHun-chakan aaina

dukh-bhari KHalq ka dukh-bhara dil hain hum

taba-e-shaer hai jangah-e-adl-o-sitam

munsif-e-KHair-o-shar haqq-o-baatil hain hum