shaer

shā.er

sipāhī kī tarah nahīñ hote

aur isī liye

jañg meñ kaam nahīñ aate

aur havā nahīñ ban sakte

paanī nahīñ ban sakte

aur aag bhī nahīñ ban sakte

vo bārish ban jaate haiñ

aur har taraf barasne lagte haiñ

vo chiḌiyā ban jaate haiñ

aur daraḳhtoñ kī hifāzat karte haiñ

vo jahāz ban jaate haiñ

aur bādaloñ ko chhūne lagte haiñ

koshish karte haiñ shā.er

ḳhushī ban jaane kī

apnī hatheliyoñ ko joḌ kar

duniyā bhar ke aañsū jam.a karne kī

koshish karte haiñ shā.er

ki ek bhī qatra miTTī meñ na milne paa.e

tar-coal meñ na jamne paa.e

ehsās hotā hai unheñ motiyoñ kī qadar-o-qīmat kā

apne ḳhvāboñ kī reshmī Dor se maalā banāte rahte haiñ

sitāre nahīñ joḌte vo

āñsuoñ ke saath

phuul nahīñ pirote os meñ Duube hue

apnī is Dor meñ bahut sī chīzeñ chhoḌ dete haiñ

vo ḳhālī rah jaane vaale diloñ ke liye

daraḳhtoñ ko be-jagah nahīñ karte

saaya nahīñ churāte un kā

gilahriyoñ ko nahīñ mārte

apnī jeb meñ chhupī muñg-phaliyāñ

daraḳht ke paas rakh ke

na jaane kahāñ chale jaate haiñ

nazar hī nahīñ aate

daraḳht batā nahīñ paate

ki shā.er āsmān ko chhūtā

ek daraḳht ban ke

duniyā meñ samā ga.e haiñ

shaer

sipahi ki tarah nahin hote

aur isi liye

jang mein kaam nahin aate

aur hawa nahin ban sakte

pani nahin ban sakte

aur aag bhi nahin ban sakte

wo barish ban jate hain

aur har taraf barasne lagte hain

wo chiDiya ban jate hain

aur daraKHton ki hifazat karte hain

wo jahaz ban jate hain

aur baadalon ko chhune lagte hain

koshish karte hain shaer

KHushi ban jaane ki

apni hatheliyon ko joD kar

duniya bhar ke aansu jama karne ki

koshish karte hain shaer

ki ek bhi qatra miTTi mein na milne pae

tar-coal mein na jamne pae

ehsas hota hai unhen motiyon ki qadar-o-qimat ka

apne KHwabon ki reshmi Dor se mala banate rahte hain

sitare nahin joDte wo

aansuon ke sath

phul nahin pirote os mein Dube hue

apni is Dor mein bahut si chizen chhoD dete hain

wo KHali rah jaane wale dilon ke liye

daraKHton ko be-jagah nahin karte

saya nahin churaate un ka

gilahriyon ko nahin marte

apni jeb mein chhupi mung-phaliyan

daraKHt ke pas rakh ke

na jaane kahan chale jate hain

nazar hi nahin aate

daraKHt bata nahin pate

ki shaer aasman ko chhuta

ek daraKHt ban ke

duniya mein sama gae hain