shair

bayāñ kyā tujh se ho hamdam ki shā.ir kaun hai kyā hai

vo is duniyā meñ rah kar aur hī aalam meñ rahtā hai

kabhī taḳh.īl kī pahnā.iyoñ meñ gum sā phirtā hai

kabhī kaun-o-makāñ kī vus.atoñ meñ Duub jaatā hai

agar tafsīl ho darkār jo shā.ir kī fitrat kī

huī hai muḳhtasar ash.ār meñ tafsīr shā.ir kī

tabassum-kesh taskīñ-dah tamaddun-sāz hotā hai

hayāt-afroz zauq-e-dīd kā dam-sāz hotā hai

jahān-e-hosh kā sarmāya-e-sad-nāz hotā hai

har ik andāz meñ sarmastiyoñ kā raaz hotā hai

shu.ūr-e-zindagī jis ke tafakkur se sañvartā hai

jahān-e-rang-o-bū jis kī nigāhoñ meñ nikhartā hai

ye jalve ye bahāreñ ye gulistāñ jis ke dam se hai

hayāt-e-shauq kī taskīñ kā sāmāñ jis ke dam se hai

ye har mumkin bahār-e-bazm-e-imkāñ jis ke dam se hai

lab-e-ejāz se hastī ġhazal-ḳhvāñ jis ke dam se hai

ye sab sar-garmī-e-ehsās hai shā.ir kī hastī se

surūr-o-kaif kī sarmastiyāñ haiñ us kī mastī se

bahr-ālam salīqe azm-o-himmat kā sikhātā hai

bahar-sūrat jamāl-e-azmat-e-hastī dikhātā hai

surūd-e-zindagī par zindagī ke giit gaatā hai

jahāñ dil sard paḌ jaate haiñ shā.ir muskurātā hai

nishān-e-azmat-e-insāniyat kā naam hai shā.ir

sarāpā lutf-o-azm-o-hosh kā paiġhām hai shā.ir

bayan kya tujh se ho hamdam ki shair kaun hai kya hai

wo is duniya mein rah kar aur hi aalam mein rahta hai

kabhi taKHil ki pahnaiyon mein gum sa phirta hai

kabhi kaun-o-makan ki wusaton mein Dub jata hai

agar tafsil ho darkar jo shair ki fitrat ki

hui hai muKHtasar ashaar mein tafsir shair ki

tabassum-kesh taskin-dah tamaddun-saz hota hai

hayat-afroz zauq-e-did ka dam-saz hota hai

jahan-e-hosh ka sarmaya-e-sad-naz hota hai

har ek andaz mein sarmastiyon ka raaz hota hai

shuur-e-zindagi jis ke tafakkur se sanwarta hai

jahan-e-rang-o-bu jis ki nigahon mein nikharta hai

ye jalwe ye bahaaren ye gulistan jis ke dam se hai

hayat-e-shauq ki taskin ka saman jis ke dam se hai

ye har mumkin bahaar-e-bazm-e-imkan jis ke dam se hai

lab-e-ejaz se hasti ghazal-KHwan jis ke dam se hai

ye sab sar-garmi-e-ehsas hai shair ki hasti se

surur-o-kaif ki sarmastiyan hain us ki masti se

bahr-alam saliqe azm-o-himmat ka sikhata hai

bahar-surat jamal-e-azmat-e-hasti dikhata hai

surud-e-zindagi par zindagi ke git gata hai

jahan dil sard paD jate hain shair muskuraata hai

nishan-e-azmat-e-insaniyat ka nam hai shair

sarapa lutf-o-azm-o-hosh ka paigham hai shair