shair ke irade

zulmat ke har nishān miTā kar rahūñgā maiñ

parde jahālatoñ ke uThā kar rahūñgā maiñ

gul ho chuke nizām-e-kohan ke diye tamām

koī nayā charāġh jalā kar rahūñgā maiñ

shā.ir huuñ inqalāb kī dhun hai mujhe mudām

bigḌī huī ravish ko banā kar rahūñgā maiñ

merī navā suneñge javānān-e-sarfarosh

ḳhvābīda ġhairatoñ ko jagā kar rahūñgā maiñ

lau de uTheñge qaum ke jazbāt garm garm

siine meñ sab ke aag lagā kar rahūñgā maiñ

apnī fuġhān-e-nīm-shabī kī mujhe qasam

hindostāñ ko ḳhuld banā kar rahūñgā maiñ

is kashmakash meñ jaan kī baazī lagā.ūñgā

duniyā ko ye bhī khel dikhā kar rahūñgā maiñ

denā vatan pe jaan hayāt-e-davām hai

ye raaz har bashar ko batā kar rahūñgā maiñ

ahl-e-jafā se jang javānoñ kā farz hai

is farz ko 'bahār' nibhā kar rahūñgā meñ

zulmat ke har nishan miTa kar rahunga main

parde jahaalaton ke uTha kar rahunga main

gul ho chuke nizam-e-kohan ke diye tamam

koi naya charagh jala kar rahunga main

shair hun inqalab ki dhun hai mujhe mudam

bigDi hui rawish ko bana kar rahunga main

meri nawa sunenge jawanan-e-sarfarosh

KHwabida ghairaton ko jaga kar rahunga main

lau de uThenge qaum ke jazbaat garm garm

sine mein sab ke aag laga kar rahunga main

apni fughan-e-nim-shabi ki mujhe qasam

hindostan ko KHuld bana kar rahunga main

is kashmakash mein jaan ki bazi lagaunga

duniya ko ye bhi khel dikha kar rahunga main

dena watan pe jaan hayat-e-dawam hai

ye raaz har bashar ko bata kar rahunga main

ahl-e-jafa se jang jawanon ka farz hai

is farz ko 'bahaar' nibha kar rahunga mein