shair se KHitab

mulk meñ jab inqalāb taaza lā sakte nahīñ

bijliyāñ jab ḳhirman-e-dil par girā sakte nahīñ

sho.ala-afshānī-e-barq-e-nāla-e-pur-soz se

aag jab dāmān-e-mahfil meñ lagā sakte nahīñ

jab na khele jalvatoñ meñ shāhid-e-ilhām se

jab harīm-e-nāz ke parde uThā sakte nahīñ

jalva-e-husn-e-ma.ānī se na señkī jab nigāh

jab urūs-e-fikr kī ḳhalvat sajā sakte nahīñ

jab badal sakte nahīñ kuchh gardish-e-daurāñ kī chaal

apne mustaqbil ko jab maazī banā sakte nahīñ

ahd-e-hāzir meñ vafūr-e-jazba-e-betāb se

saarī duniyā ko jab ik markaz pe lā sakte nahīñ

husn meñ bharte nahīñ jab ishq kā barqī asar

ishq meñ jab husn kā jaadū jagā sakte nahīñ

khīñch sakte jab nahīñ naqsha nigāh-e-shauq kā

jab nigāhoñ ko taḌap dil kī dikhā sakte nahīñ

aise shā.ir kā suḳhan nā-qābil-e-tahsīn hai

shā.irī aisī mazāq-e-sher kī tauhīn hai

mulk mein jab inqalab taza la sakte nahin

bijliyan jab KHirman-e-dil par gira sakte nahin

shoala-afshani-e-barq-e-nala-e-pur-soz se

aag jab daman-e-mahfil mein laga sakte nahin

jab na khele jalwaton mein shahid-e-ilham se

jab harim-e-naz ke parde uTha sakte nahin

jalwa-e-husn-e-maani se na senki jab nigah

jab urus-e-fikr ki KHalwat saja sakte nahin

jab badal sakte nahin kuchh gardish-e-dauran ki chaal

apne mustaqbil ko jab mazi bana sakte nahin

ahd-e-hazir mein wafur-e-jazba-e-betab se

sari duniya ko jab ek markaz pe la sakte nahin

husn mein bharte nahin jab ishq ka barqi asar

ishq mein jab husn ka jadu jaga sakte nahin

khinch sakte jab nahin naqsha nigah-e-shauq ka

jab nigahon ko taDap dil ki dikha sakte nahin

aise shair ka suKHan na-qabil-e-tahsin hai

shairi aisi mazaq-e-sher ki tauhin hai