shaKH-e-tamasha

maiñ kahtā huuñ ki tū merī nahīñ koī to kahtī hai ki tū merā

nahīñ koī havā meñ rang hai ḳhushbū hai maiñ kahtā huuñ

ḳhushbū hai havā meñ rang hai to bhī ye kahtī hai chahaktī shaam

kī chiḌiyoñ kī āvāz-e-musalsal meñ sitāra shaam kā mujh ko

bulātā hai to terā naam letā hai sitāra shaam kā tujh ko bulātā

hai to merā naam letā hai magar donoñ ye kahte haiñ sitāra

koī bhī chamkā nahīñ ab tak kahāñ kā naam aur kis ko bulānā

aur phir to mujh se kahtī hai ki duurī kī hadoñ par terī

sāñseñ merī sāñsoñ se nahīñ uljhīñ maiñ

kahtā huuñ ki duurī kī hadoñ par terī sāñseñ merī

sāñsoñ se nahīñ uljhīñ kabhī ham niiñd meñ bāteñ kareñ

ik dūsre ke paas hoñ yā ḳhvāb kī dīvār par baiThe

hue ik dūsre ke ghar meñ jhāñkeñ phir kahīñ kuchh

bhī nahīñ thā to kahīñ thī maiñ kahīñ thā aur kabhī hāthoñ

meñ haath aur ik masāfat ho kabhī jangal kī paanī kī

kabhī donoñ havā meñ tairte hoñ aur yak dam chauñk jaa.eñ

aur kaheñ kyā haath aur kaisī masāfat kaise jangal kaisā paanī saath

chalnā ḳhvāb hai sab ḳhvāb hai sab ḳhvāb bhī to ik haqīqat hai

to phir inkār kar deñ ḳhvāb kā maujūd kā aur duur kā inkār sab

inkār kyā ham haiñ kahāñ haiñ kyoñ haiñ kyā kuchh māvarā hai

yā yahī sab hai magar kuchh bhī nahīñ khultā ki ham vo qufl haiñ jis

par samay kā zang baḌhtā jā.egā paiham kabhī donoñ ye māneñ

dil ke rishte ḳhuuñ se baḌh kar haiñ magar dil ko TaToleñ aur

kahīñ kuchh bhī nahīñ miltā tū mere vāste pāgal ho aur maiñ

terī ḳhātir huuñ magar duniyā to kyā phir ḳhud se bhī sharmindagī ho

haa.e maiñ tere liye pāgal thī maiñ tere liye kab thā

kabhī ham jāgne sone kī ik kaifiyyat-e-be-tarah meñ ro.eñ hañseñ

aur āsmāñ sī ḳhāmushī meñ lipTe dekhe jaa.eñ bāham aur

rasā.ī ke baḌhe hāthoñ se Takrā.e koī dīvār shaffāf

aur nādīda to ham donoñ kahīñ to Thiik hai apnī jagah

tū bhī ki tū merī nahīñ koī ki tū merā nahīñ

main kahta hun ki tu meri nahin koi to kahti hai ki tu mera

nahin koi hawa mein rang hai KHushbu hai main kahta hun

KHushbu hai hawa mein rang hai to bhi ye kahti hai chahakti sham

ki chiDiyon ki aawaz-e-musalsal mein sitara sham ka mujh ko

bulata hai to tera nam leta hai sitara sham ka tujh ko bulata

hai to mera nam leta hai magar donon ye kahte hain sitara

koi bhi chamka nahin ab tak kahan ka nam aur kis ko bulana

aur phir to mujh se kahti hai ki duri ki hadon par teri

sansen meri sanson se nahin uljhin main

kahta hun ki duri ki hadon par teri sansen meri

sanson se nahin uljhin kabhi hum nind mein baaten karen

ek dusre ke pas hon ya KHwab ki diwar par baiThe

hue ek dusre ke ghar mein jhanken phir kahin kuchh

bhi nahin tha to kahin thi main kahin tha aur kabhi hathon

mein hath aur ek masafat ho kabhi jangal ki pani ki

kabhi donon hawa mein tairte hon aur yak dam chaunk jaen

aur kahen kya hath aur kaisi masafat kaise jangal kaisa pani sath

chalna KHwab hai sab KHwab hai sab KHwab bhi to ek haqiqat hai

to phir inkar kar den KHwab ka maujud ka aur dur ka inkar sab

inkar kya hum hain kahan hain kyon hain kya kuchh mawara hai

ya yahi sab hai magar kuchh bhi nahin khulta ki hum wo qufl hain jis

par samay ka zang baDhta jaega paiham kabhi donon ye manen

dil ke rishte KHun se baDh kar hain magar dil ko TaTolen aur

kahin kuchh bhi nahin milta tu mere waste pagal ho aur main

teri KHatir hun magar duniya to kya phir KHud se bhi sharmindagi ho

hae main tere liye pagal thi main tere liye kab tha

kabhi hum jagne sone ki ek kaifiyyat-e-be-tarah mein roen hansen

aur aasman si KHamushi mein lipTe dekhe jaen baham aur

rasai ke baDhe hathon se Takrae koi diwar shaffaf

aur nadida to hum donon kahin to Thik hai apni jagah

tu bhi ki tu meri nahin koi ki tu mera nahin