sham

shafaq phūlī gayā din ho ga.ī shaam

kareñge kaam karne vaale ārām

abhī pachchhim meñ chhup jā.egā sūraj

nahīñ shab bhar nazar aa.egā sūraj

chale aate haiñ ghar ko rāj-mazdūr

ki din bhar kaam karte ho ga.e chuur

mulāzim daftaroñ se aa rahe haiñ

miThā.ī aur saudā lā rahe haiñ

musāfir ne kamar manzil pe kholī

bhikārī aa ga.e phailā.e jholī

parinde uḌ chale haiñ ghoñsloñ ko

qatāreñ kaisī bāñdhī haiñ vo dekho

vo gaa.eñ bhaiñseñ char kar aa rahī haiñ

ye ab apne gharoñ ko jā rahī haiñ

havā ke jhoñke maddham ho ga.e haiñ

daraḳht ārām se ab so ga.e haiñ

karo ab pyāre bachcho tum bhī ārām

shafaq phūlī gayā din ho ga.ī shaam

shafaq phuli gaya din ho gai sham

karenge kaam karne wale aaram

abhi pachchhim mein chhup jaega suraj

nahin shab bhar nazar aaega suraj

chale aate hain ghar ko raj-mazdur

ki din bhar kaam karte ho gae chur

mulazim daftaron se aa rahe hain

miThai aur sauda la rahe hain

musafir ne kamar manzil pe kholi

bhikari aa gae phailae jholi

parinde uD chale hain ghonslon ko

qataren kaisi bandhi hain wo dekho

wo gaen bhainsen char kar aa rahi hain

ye ab apne gharon ko ja rahi hain

hawa ke jhonke maddham ho gae hain

daraKHt aaram se ab so gae hain

karo ab pyare bachcho tum bhi aaram

shafaq phuli gaya din ho gai sham