shab-baraat

kyūñkar kare na apnī numūdārī shab-barāt

chilpak chapātī halve se hai bhārī shab-barāt

zindoñ kī hai zabāñ kī mazedārī shab-barāt

murdoñ kī ruuh kī hai madad-gārī shab-barāt

lagtī hai sab ke dil ko ġharaz pyārī shab-barāt

shakkar kā jin ke halva huā vo to puure haiñ

guḌ kā huā hai jin ke vo un se adhūre haiñ

shakkar na guḌ kā jin ke vo parkaT lañDūre haiñ

auroñ ke mīThe halve chapātī ko ghūre haiñ

un kī na ādhī-pāo na kuchh saarī shab-barāt

duniyā kī daulatoñ meñ jo zardār haiñ baḌe

qandoñ ke halve roġhnī nāneñ liye khaḌe

pahuñchā.e ḳhvān phirte haiñ naukar ka.ī paḌe

zinde bhī raah takte haiñ murde bhī haiñ khaḌe

in ḳhūbiyoñ ko rakhtī hai tayyārī shab-barāt

Thiliyāñ chapātī halve kī to sab meñ chaal hai

adnā ġharīb ke ta.iiñ ye bhī muhāl hai

kaale se guḌ kī lipTī kaḌhī kī misāl hai

paanī se hāñDī gehūñ kī roTī bhī laal hai

kartī hai aisī dukhiyā pansārī shab-barāt

aur muflisoñ kī hai ye tamannā kī fātiha

dariyā pe jā ke dete haiñ baabā kī fātiha

bhatiyārī ke tanūr pa naanā kī fātiha

halvā.ī kī dukān pe daadā kī fātiha

yaañ tak to un pe laatī hai nā-chārī shab-barāt

vāris haiñ jin ke jiite vo murde bhī aan kar

halve chapātī ḳhuub hī chakhte haiñ peT-bhar

jin kā koī nahīñ hai vo phirte haiñ dar-ba-dar

auroñ ke lagte phirte haiñ konoñ se ghar-ba-ghar

un kī hai khārī nuun se bhī khārī shab-barāt

mullā jo dene fātiha ghar ghar meñ jaate haiñ

halva kahīñ kahīñ vo chapātī uḌāte haiñ

muflis koī bulāve to muñh ko chhupāte haiñ

shakkar kā halva sunte hī bas dauḌe jaate haiñ

kahte hue ye dil meñ ahā-hā rī shab-barāt

chhoḌe hai laTTū toñbaḌī har-dam banā ke jo

hākim kā pyāda kahtā hai yuuñ us se talḳh ho

kapḌe badan bachā ke jo chāho so chhoḌ do

chhappar jalāo.ge to dilāvegī sub.h ko

tum se chabūtare meñ gunahgārī shab-barāt

phirte haiñ ishq-bāz jo laḌke kī ghaat meñ

To.Tā hī le ke dete haiñ laḌke ke haath meñ

mahtābī aa ke chhoḌeñ haiñ laḌke jo raat meñ

kyā zarkiyāñ sī chhoḌe haiñ hañs hañs ke baat meñ

kartī hai kaam un ke bhī yuuñ jaarī shab-barāt

jo ranDī-bāz haiñ vo bahut dil meñ shaad ho

kyā kyā anaar chhoḌe haiñ bishnī ho rū-ba-rū

ai bī tum apnī kulhiyā hameñ chhoḌne ko do

aur chāho tum hamārā ye hat-phūl chhoḌ lo

ho jaa.e jis ke chhuTte hī phulvārī shab-barāt

aur jo bahār-e-husn ke haiñ pāk-bāz yaar

gul-kārī chhoḌe haiñ jahāñ mahbūb gul-ezār

kahte haiñ un ko dekh ke āñkhoñ meñ kar ke pyaar

kyā chāhiye miyāñ tumheñ hat-phūl aur anaar

tum par to aap hotī hai ab vaarī shab-barāt

ghanchakkar apne dam meñ kahīñ charḳh khāte haiñ

ToñTe havā.ī siiñk kahīñ qahqahate haiñ

zīñpaT-zapaT paTāḳhe kahīñ ġhul machāte haiñ

laḌkoñ ke bāñdh ġhol kahīñ laḌne jaate haiñ

kartī hai phir to aisī dhūñvādhārī shab-barāt

aa kar kisī ke sar pe chhachhūñdar lagī kaḌī

uupar se aur havā.ī kī aa kar paḌī chhaḌī

ho ga.ī gale kā haar paTāḳhe kī har laḌī

paañv se lipTī shor machā kar qalam tuḌī

kartī hai phir to aisī sitamgārī shab-barāt

chehra kisī kā jal gayā āñkheñ jhulas ga.iiñ

chhā.ī kisī kī jal ga.iiñ bāheñ jhulas ga.iiñ

Tāñgeñ bachīñ kisī kī to rāneñ jhulas ga.iiñ

moñchheñ kisī kī phuk ga.iiñ palkeñ jhulas ga.iiñ

rakhe kisī kī dāḌhī pe chiñgārī shab-barāt

koī dostoñ ko dil meñ samajhtā hai apne ġhair

koī dushmanoñ se dil kā nikāle hai apnā bair

kahtā hai vaañ 'nazīr' bhī ātish kī dekh sair

yārab to sab kī kījiyo barsā-baras kī ḳhair

be-tarah kar rahī hai numūdārī shab-barāt

kyunkar kare na apni numudari shab-baraat

chilpak chapati halwe se hai bhaari shab-baraat

zindon ki hai zaban ki mazedari shab-baraat

murdon ki ruh ki hai madad-gari shab-baraat

lagti hai sab ke dil ko gharaz pyari shab-baraat

shakkar ka jin ke halwa hua wo to pure hain

guD ka hua hai jin ke wo un se adhure hain

shakkar na guD ka jin ke wo parkaT lanDure hain

auron ke miThe halwe chapati ko ghure hain

un ki na aadhi-pao na kuchh sari shab-baraat

duniya ki daulaton mein jo zardar hain baDe

qandon ke halwe roghni nanen liye khaDe

pahunchae KHwan phirte hain naukar kai paDe

zinde bhi rah takte hain murde bhi hain khaDe

in KHubiyon ko rakhti hai tayyari shab-baraat

Thiliyan chapati halwe ki to sab mein chaal hai

adna gharib ke tain ye bhi muhaal hai

kale se guD ki lipTi kaDhi ki misal hai

pani se hanDi gehun ki roTi bhi lal hai

karti hai aisi dukhiya pansari shab-baraat

aur muflison ki hai ye tamanna ki fatiha

dariya pe ja ke dete hain baba ki fatiha

bhatiyari ke tanur pa nana ki fatiha

halwai ki dukan pe dada ki fatiha

yan tak to un pe lati hai na-chaari shab-baraat

waris hain jin ke jite wo murde bhi aan kar

halwe chapati KHub hi chakhte hain peT-bhar

jin ka koi nahin hai wo phirte hain dar-ba-dar

auron ke lagte phirte hain konon se ghar-ba-ghar

un ki hai khaari nun se bhi khaari shab-baraat

mulla jo dene fatiha ghar ghar mein jate hain

halwa kahin kahin wo chapati uDate hain

muflis koi bulawe to munh ko chhupate hain

shakkar ka halwa sunte hi bas dauDe jate hain

kahte hue ye dil mein aha-ha ri shab-baraat

chhoDe hai laTTu tonbaDi har-dam bana ke jo

hakim ka pyaada kahta hai yun us se talKH ho

kapDe badan bacha ke jo chaho so chhoD do

chhappar jalaoge to dilawegi subh ko

tum se chabutare mein gunahgari shab-baraat

phirte hain ishq-baz jo laDke ki ghat mein

ToTa hi le ke dete hain laDke ke hath mein

mahtabi aa ke chhoDen hain laDke jo raat mein

kya zarkiyan si chhoDe hain hans hans ke baat mein

karti hai kaam un ke bhi yun jari shab-baraat

jo ranDi-baz hain wo bahut dil mein shad ho

kya kya anar chhoDe hain bishni ho ru-ba-ru

ai bi tum apni kulhiya hamein chhoDne ko do

aur chaho tum hamara ye hat-phul chhoD lo

ho jae jis ke chhuTte hi phulwari shab-baraat

aur jo bahaar-e-husn ke hain pak-baz yar

gul-kari chhoDe hain jahan mahbub gul-ezar

kahte hain un ko dekh ke aankhon mein kar ke pyar

kya chahiye miyan tumhein hat-phul aur anar

tum par to aap hoti hai ab wari shab-baraat

ghanchakkar apne dam mein kahin charKH khate hain

TonTe hawai sink kahin qahqahate hain

zinpaT-zapaT paTaKHe kahin ghul machate hain

laDkon ke bandh ghol kahin laDne jate hain

karti hai phir to aisi dhunwadhaari shab-baraat

aa kar kisi ke sar pe chhachhundar lagi kaDi

upar se aur hawai ki aa kar paDi chhaDi

ho gai gale ka haar paTaKHe ki har laDi

panw se lipTi shor macha kar qalam tuDi

karti hai phir to aisi sitamgari shab-baraat

chehra kisi ka jal gaya aankhen jhulas gain

chhai kisi ki jal gain bahen jhulas gain

Tangen bachin kisi ki to ranen jhulas gain

monchhen kisi ki phuk gain palken jhulas gain

rakhe kisi ki daDhi pe chingari shab-baraat

koi doston ko dil mein samajhta hai apne ghair

koi dushmanon se dil ka nikale hai apna bair

kahta hai wan 'nazir' bhi aatish ki dekh sair

yarab to sab ki kijiyo barsa-baras ki KHair

be-tarah kar rahi hai numudari shab-baraat