shab-e-shikast

bārahvīñ martaba

maut kā ḳhvāb takmīl tak aate aate kahīñ rah gayā hai

mujhe koī zaḳhmoñ ke Tāñke lagānā sikhā de

to maiñ apnā chamḌā use daan kar dūñgā

phir chāhe vo us ke juute banā.e

yā apnī balāoñ kā sadqa utāre

agar devtāoñ meñ jhagḌā huā aur tum is zamīñ par

kisī an-sune qahqahe ke shikam se barāmad hue

to maiñ apnī poroñ pe ugtī huī raat se tum meñ itnī udāsī bharūñgā

ki tum chīḳhte chīḳhte ek dam hast hone lagoge

lipaT jāoge mujh meñ paivast hone lagoge

magar maiñ abhī terahvāñ ḳhvāb āñkhoñ meñ paivast karne lagā huuñ

barahwin martaba

maut ka KHwab takmil tak aate aate kahin rah gaya hai

mujhe koi zaKHmon ke Tanke lagana sikha de

to main apna chamDa use dan kar dunga

phir chahe wo us ke jute banae

ya apni balaon ka sadqa utare

agar dewtaon mein jhagDa hua aur tum is zamin par

kisi an-sune qahqahe ke shikam se baramad hue

to main apni poron pe ugti hui raat se tum mein itni udasi bharunga

ki tum chiKHte chiKHte ek dam hast hone lagoge

lipaT jaoge mujh mein paiwast hone lagoge

magar main abhi terahwan KHwab aankhon mein paiwast karne laga hun