shahar

log kahte haiñ ki tujh se thak jaanā

mar jaane ke barābar hai

aur mujhe bhī kabhī kabhī aisā hī lagtā hai

to sun shahar meñ tujh se saaf saaf kah duuñ

ki maiñ tujh se thak gayā huuñ

yā mujhe yuuñ lagtā hai

ki mere sar se us baap kā saaya uTh gayā hai

jo itne dinoñ merī nigahbānī kar rahā thā

sun shahar

agar mar jā.ūñ

aur log mujhe dafnāne le jaa.eñ

to jhapaT ke tū mujhe god meñ le lenā

aur baal khole kahānī vaalī maaoñ kī tarah

mujhe āñchal meñ chhupā kar chīḳh chīḳh kar un se kah denā

ki nahīñ ye merā beTā hai

mere jiite jī ye kabhī yatīm nahīñ ho saktā

na hī

mere jiite jī koī ise mujh se chhīn saktā hai

log kahte hain ki tujh se thak jaana

mar jaane ke barabar hai

aur mujhe bhi kabhi kabhi aisa hi lagta hai

to sun shahar mein tujh se saf saf kah dun

ki main tujh se thak gaya hun

ya mujhe yun lagta hai

ki mere sar se us bap ka saya uTh gaya hai

jo itne dinon meri nigahbani kar raha tha

sun shahar

agar mar jaun

aur log mujhe dafnane le jaen

to jhapaT ke tu mujhe god mein le lena

aur baal khole kahani wali maon ki tarah

mujhe aanchal mein chhupa kar chiKH chiKH kar un se kah dena

ki nahin ye mera beTa hai

mere jite ji ye kabhi yatim nahin ho sakta

na hi

mere jite ji koi ise mujh se chhin sakta hai