shahr-ashob

ai mire des meñ baste hue achchhe logo

ḳhud hī socho ki sazā jaisī ye tanhā.ī hai

jis jagah phuul mahakte the vafāoñ ke kabhī

in fazāoñ meñ aTal raat kī gahrā.ī hai

in añdheroñ se pare aaj bhī is duniyā meñ

log ḳhush-hāl mohabbat se rahā karte haiñ

aaj bhī shaam Dhale sukh kī hasīñ vaadī meñ

log peḌoñ ke tale roz milā karte haiñ

roz uThtī hai mahak un ke hasīñ āñgan se

sādgī jiine kā sāmān huā kartī hai

un kī āñkhoñ meñ mahakte haiñ gulāboñ ke chaman

zindagī kaif kā unvān huā kartī hai

ai mire des meñ baste hue achchhe logo

zindagī kaun se manzar meñ guzārī tum ne

ḳhaak aur ḳhuun se lithḌī huī manzil kī talab

kaun se qarz kī zanjīr utārī tum ne

yuuñ ulajhte ho bhaTakte hue aahū kī tarah

kaise āshob meñ ik umr gañvā dī tum ne

ḳhārzāroñ se likhī dil pe kahānī dukh kī

kaun sī shab kī siyāhī ko jilā dī tum ne

ai mire des meñ baste hue achchhe logo

ḳhud ko pahchān ke is baab meñ rusvā na karo

zindagī sirf mohabbat kā hasīñ tohfa hai

is hasīñ ḳhvāb kī ta.abīr kā saudā na karo

ai mere des mein baste hue achchhe logo

KHud hi socho ki saza jaisi ye tanhai hai

jis jagah phul mahakte the wafaon ke kabhi

in fazaon mein aTal raat ki gahrai hai

in andheron se pare aaj bhi is duniya mein

log KHush-haal mohabbat se raha karte hain

aaj bhi sham Dhale sukh ki hasin wadi mein

log peDon ke tale roz mila karte hain

roz uThti hai mahak un ke hasin aangan se

sadgi jine ka saman hua karti hai

un ki aankhon mein mahakte hain gulabon ke chaman

zindagi kaif ka unwan hua karti hai

ai mere des mein baste hue achchhe logo

zindagi kaun se manzar mein guzari tum ne

KHak aur KHun se lithDi hui manzil ki talab

kaun se qarz ki zanjir utari tum ne

yun ulajhte ho bhaTakte hue aahu ki tarah

kaise aashob mein ek umr ganwa di tum ne

KHarzaron se likhi dil pe kahani dukh ki

kaun si shab ki siyahi ko jila di tum ne

ai mere des mein baste hue achchhe logo

KHud ko pahchan ke is bab mein ruswa na karo

zindagi sirf mohabbat ka hasin tohfa hai

is hasin KHwab ki tabir ka sauda na karo