shajar-e-mamnua se pare

ai bī-bī havvā

ham tere bachche

tujh se bichhaḌ ke

bashrī samundar ke

pai-dar-pai thapeḌoñ se

duur aur bhī duur ho ga.e haiñ

bhiiḌ meñ kho ga.e haiñ

tumhāre hamāre

darmiyāñ thā jo harf-e-shīrīñ kā qissa

vo dard-āshnā lamha, vo mamtā se labrez rishta

is rishte kī Dor se bañdhe

ham ḳhalāoñ meñ hachkole khā rahe haiñ

patañgoñ kī mānind

nanhe bachche ke hāthoñ se juuñ

chhūT jaa.e

ġhubāroñ kī Dor

aur bikhar jaa.eñ jaise

āsmāñ kī nāpaid bulandiyoñ meñ sabhī

ham bhii,

un hī ġhubāroñ kī tarah

ai bī-bī havvā

tujh se bichhaḌ ke

bhaTakte rahe haiñ

har lamha is ulajhtī bhūl-bhulayyoñ sī duniyā meñ

jī rahe haiñ

kisī taur

terī mamtā kī chaah meñ, aas lagā.e

shāyad

ḳhudā ko

ham par bhī kabhī taras aa jaa.e

aur...

naaf ke is uljhe hue rishte kā sirā

dobāra kahīñ jā ke phir tujh se mil jaa.e

shāyad

phir koī duniyā

kun-fa-yakūn se

ḳhalq ho jaa.e!

jahāñ bāġh-e-bahisht ke makīñ hoñ

aur ham hoñ

jahāñ iblīs kā na ho guzar

jahāñ shaitān kā na Dar ho

jahāñ amn-o-āshtī ho tamām!

ai kāsh!

apnā bhī aisā ghar ho

shajar-e-mamnūa se pare

ai bi-bi hawwa

hum tere bachche

tujh se bichhaD ke

bashri samundar ke

pai-dar-pai thapeDon se

dur aur bhi dur ho gae hain

bhiD mein kho gae hain

tumhaare hamare

darmiyan tha jo harf-e-shirin ka qissa

wo dard-ashna lamha, wo mamta se labrez rishta

is rishte ki Dor se bandhe

hum KHalaon mein hachkole kha rahe hain

patangon ki manind

nanhe bachche ke hathon se jun

chhuT jae

ghubaron ki Dor

aur bikhar jaen jaise

aasman ki napaid bulandiyon mein sabhi

hum bhi,

un hi ghubaron ki tarah

ai bi-bi hawwa

tujh se bichhaD ke

bhaTakte rahe hain

har lamha is ulajhti bhul-bhulayyon si duniya mein

ji rahe hain

kisi taur

teri mamta ki chah mein, aas lagae

shayad

KHuda ko

hum par bhi kabhi taras aa jae

aur

naf ke is uljhe hue rishte ka sira

dobara kahin ja ke phir tujh se mil jae

shayad

phir koi duniya

kun-fa-yakun se

KHalq ho jae!

jahan bagh-e-bahisht ke makin hon

aur hum hon

jahan iblis ka na ho guzar

jahan shaitan ka na Dar ho

jahan amn-o-ashti ho tamam!

ai kash!

apna bhi aisa ghar ho

shajar-e-mamnua se pare