shanaKHt

maiñ ek āzād vatan kī shahrī huuñ

apne shahar gaañv galiyoñ khet khaliyānoñ ke

sabhī rastoñ ko jāntī

bin-dekhe sab daraḳhtoñ ko

un kī ḳhushbū se pahchān saktī huuñ

is miTTī kī qabroñ meñ

mere aabā kā lams shāmil hai

maiñ is kī mahak apnī ruuh meñ mahsūs kartī huuñ

mere āñgan meñ utarte sab parinde

usī havā meñ saañs lete haiñ jis meñ maiñ jiitī huuñ

maiñ apne parindoñ is miTTī aur havā ko chhoḌ kar

kaise kahīñ aur zindagī jī saktī huuñ

maiñ ḳhaufzada to nahīñ

magar ab aksar kuchh guzargāhoñ se guzarte hue

achānak mujhe rok kar mashīnī aale se check kiyā jaatā hai

machine mere badan meñ kuchh talāsh kartī hai

mere libāde aur hand-bag ko khañgālā jaatā hai

mere hand-bag meñ doctor ke chand nusḳhoñ

ek qalam gulābī rañg kī lipstick aur ek qadīm se

mobile phone ke sivā

kuchh nahīñ nikaltā

chand ḳhuñḳhār kutte mujhe aur merī savārī ko sūñghte haiñ

tab maiñ apne aap se bhī nazreñ churā letī huuñ

is taklīf-dah amal se jab kuchh hāsil nahīñ hotā

to mujhe aage jaane kī ijāzat mil hī jaatī hai

maiñ ḳhaufzada to nahīñ

magar sochtī huuñ

apne hī vatan meñ merī shanāḳht

itnī mashkūk kyoñ ho ga.ī hai

main ek aazad watan ki shahri hun

apne shahar ganw galiyon khet khaliyanon ke

sabhi raston ko jaanti

bin-dekhe sab daraKHton ko

un ki KHushbu se pahchan sakti hun

is miTTi ki qabron mein

mere aaba ka lams shamil hai

main is ki mahak apni ruh mein mahsus karti hun

mere aangan mein utarte sab parinde

usi hawa mein sans lete hain jis mein main jiti hun

main apne parindon is miTTi aur hawa ko chhoD kar

kaise kahin aur zindagi ji sakti hun

main KHaufzada to nahin

magar ab aksar kuchh guzargahon se guzarte hue

achanak mujhe rok kar mashini aale se check kiya jata hai

machine mere badan mein kuchh talash karti hai

mere libaade aur hand-bag ko khangala jata hai

mere hand-bag mein doctor ke chand nusKHon

ek qalam gulabi rang ki lipstick aur ek qadim se

mobile phone ke siwa

kuchh nahin nikalta

chand KHunKHar kutte mujhe aur meri sawari ko sunghte hain

tab main apne aap se bhi nazren chura leti hun

is taklif-dah amal se jab kuchh hasil nahin hota

to mujhe aage jaane ki ijazat mil hi jati hai

main KHaufzada to nahin

magar sochti hun

apne hi watan mein meri shanaKHt

itni mashkuk kyon ho gai hai