shararat

button qamīz ke

ab bhī TūTte haiñ magar

nazdīk mere chehre ke

bikhrī huī sāñsoñ kī

ḳhushbū nahīñ uḌtī

button ab bhī TūTte haiñ magar

uñgliyoñ meñ kapkapī nahīñ hotī

na hī

suuī aur taage meñ

pahlī sī jang hotī hai

button ab bhī TūTte haiñ magar

dā.era merī bāñhoñ kā

ab kabhī nahīñ bantā

suuī ab dil-lagī meñ nahīñ chubhtī

ab koī be-sabab nahīñ hañstā

aur chupke se ye nahīñ kahtā

aaj milne kisī se mat jaanā

aaj daftar se ghar chale aanā

aaj achchhī sī Dish banā.ūñgī

aaj ḳhud ko bhī maiñ sajā.ūñgī

ka.ī baras

baḌā zamāna huā

ab kuchh nahīñ hotā

button to ab bhī TuuTā karte haiñ

ab unheñ maiñ hī Taañk letā huuñ

kabhī milegā nahīñ

varna us se ye batātā maiñ

button TūTte nahīñ the washing meñ

button maiñ hī toḌā kartā thā

button qamiz ke

ab bhi TuTte hain magar

nazdik mere chehre ke

bikhri hui sanson ki

KHushbu nahin uDti

button ab bhi TuTte hain magar

ungliyon mein kapkapi nahin hoti

na hi

sui aur tage mein

pahli si jang hoti hai

button ab bhi TuTte hain magar

daera meri banhon ka

ab kabhi nahin banta

sui ab dil-lagi mein nahin chubhti

ab koi be-sabab nahin hansta

aur chupke se ye nahin kahta

aaj milne kisi se mat jaana

aaj daftar se ghar chale aana

aaj achchhi si Dish banaungi

aaj KHud ko bhi main sajaungi

kai baras

baDa zamana hua

ab kuchh nahin hota

button to ab bhi TuTa karte hain

ab unhen main hi Tank leta hun

kabhi milega nahin

warna us se ye batata main

button TuTte nahin the washing mein

button main hi toDa karta tha